7 mıllıon teńge nesıe alǵan kásipkerdiń ólimin onyń júrgizýshisi uıymdastyrdy
ASTANA. Maýsymnyń 9-y. QazAqparat /Aıdar Ospanalıev/ - Petropavlda 7 mıllıon teńge nesıe azamattyń ólimine sebepshi boldy,
dep habarlaıdy QazAqparat.
Іshki ister mınıstrliginiń málimetterine qaraǵanda, mamyrdyń 16-sy kúni Petropavl qalalyq Іshki ister departamentine 40 jasar áıel kelip, óziniń 41 jasar kúıeýiniń tańǵy saǵat 9-00-dar shamasynda jumysyna shyǵyp, sodan qaıtyp oralmaǵandyǵyn aıtqan. Tekserý barysynda kásipker azamat óziniń páteri men kóligin kepildikke qoıyp, bankten 7 mıllıon 400 myń teńge nesıe alǵandyǵy anyqtaldy. Arnaıy júrgizilgen jedel-izdestirý jumystarynyń barysynda Soltústik Qazaqstan oblysynyń Esil aýdanyna qarasty Petrovka aýlynyń 19 jasar turǵyny ustaldy. Ol óziniń Petropavl qalasynda turatyn jáne sonda júrgizýshi bolyp jumys isteıtin dosymen birlesip, aqsha úshin adam óltirgendikterin moıyndaǵan.
Olar kásipker azamatty sholaq myltyqpen basynan atyp óltirip, qylmystaryn jasyrý úshin máıitti ormanda aldyn ala qazyp, daıyndalyp qoıǵan jerge kómip tastaǵan. Ustalǵan azamattyń málimetteri boıynsha óltirilgen azamattyń máıiti tabylyp, qylmys jasalǵan qarý da tárkilengen. Qazirgi tańda tártip saqshylarynyń qolyna túsken azamat ýaqytsha ustaý orynyna qamalyp, qylmysty uıymdastyrýshy, ıaǵnı kásipkerdiń júrgizýshisine halyqaralyq izdeý jarııalandy.
