7 mıllıon emtıhan ótkizgen qazaqstandyq platforma halyqaralyq kórmege shyqty
ASTANA. KAZINFORM — Qazaqstandyq ІT kompanııanyń jasandy ıntellekt salasyndaǵy jobalary Birikken Arab Ámirlikterinde joǵary baǵalandy.
Qazaqstandyq TrustExam.ai tehnologııalyq jobasy ADIPEC 2026 halyqaralyq energetıkalyq kórmesi men konferentsııasynda munaı-gaz kompanııalary qyzmetkerleri men merdigerleriniń bilimin qashyqtan tekserýge arnalǵan platformasyn tanystyrdy. Іs-shara 2–5 qarasha aralyǵynda Birikken Arab Ámirlikteriniń Abý-Dabı qalasyndaǵy ADNEC Centre Abu Dhabi kórme ortalyǵynda ótip jatyr.
Sheshim kásiporyndarǵa densaýlyqty qorǵaý, eńbek qaýipsizdigi jáne qorshaǵan ortany qorǵaý (HSE) salasyndaǵy bilimdi júıeli túrde tekserýdi uıymdastyrýǵa kómektesedi. Platforma ártúrli óndiristik nysandardyń qyzmetkerlerimen, aýysymdyq brıgadalarmen jáne merdiger uıymdarmen jumys isteýge beıimdelgen.
TrustExam oqýdan keıin, óndiristik nusqaýlyqtar jańartylǵanda nemese qyzmetkerlerdiń daıarlyǵyndaǵy olqylyqtar anyqtalǵanda onlaın-testileý ótkizýge múmkindik beredi. Tekserý nátıjeleri boıynsha mamandar qosymsha nazar aýdarýdy qajet etetin taqyryptardy anyqtap, naqty qajettilikterge saı oqytýdy uıymdastyra jáne qyzmetkerlerdiń bilimin qaıta baǵalaı alady. Testileýdiń mazmuny men jıiligin kásiporyn óz rásimderi men mindetterin eskere otyryp belgileıdi.
— Platforma testileýdi, bıometrııalyq sáıkestendirýdi jáne jasandy ıntellektke negizdelgen proktorıngti biriktiredi. Proktorıng emtıhan erejeleriniń saqtalýyn baqylaýǵa arnalǵan. Bıometrııa testti tıisti qyzmetkerdiń ózi tapsyryp jatqanyn rastaýǵa kómektesedi. Jasandy ıntellekt testileý barysynda bógde adamnyń kómegin paıdalaný nemese basqa da ereje buzýshylyqtar bolýy múmkin ekenin kórsetetin oqıǵalardy belgilep, ýákiletti mamandarǵa qaraý úshin tıisti materıaldardy usynady, — delingen habarlamada.
Bul tásil qyzmetkerlerdi bir emtıhan ortalyǵyna jınamaı-aq, ártúrli nysandar men aýysymdar úshin bilimdi tekserýdi uıymdastyrýǵa múmkindik beredi. Uıym bilimdegi olqylyqtar men qaıta oqytý nátıjeleri týraly derekterdi, sondaı-aq qyzmetkerdiń testti óz betinshe tapsyrǵanyn baǵalaýǵa arnalǵan materıaldardy alady. Teorııalyq bilimdi tekserý kásiporyndaǵy praktıkalyq daıarlyq pen jumysqa jiberý rásimderin tolyqtyrady.
TrustExam komandasynyń málimetinshe, energetıka salasyndaǵy baǵdarlamalardyń birinde platforma arqyly shamamen 50 myń testileý ótkizilgen.
Mundaı tehnologııalyq sheshimderdi damytý Qazaqstan Respýblıkasynyń Prezıdenti Qasym-Jomart Toqaev aıqyndaǵan ekonomıkany aýqymdy tsıfrlandyrý, negizgi salalarǵa jasandy ıntellektini engizý jáne otandyq IT-ázirlemelerdi qoldaý basymdyqtaryna sáıkes keledi.
Memleket basshysy ınnovatsııalyq jobalardy damytýdyń jáne qazaqstandyq tehnologııalardyń halyqaralyq naryqtaǵy básekege qabilettiligin arttyrýdyń mańyzdylyǵyn birneshe ret atap ótken bolatyn.
TrustExam.ai jobasynyń energetıka salasyndaǵy álemdegi eń iri halyqaralyq alańdardyń birinde tanystyrylýy otandyq ázirlemelerdiń áleýetin jáne olardyń halyqaralyq deńgeıge shyǵý múmkindikterin kórsetedi.
Aıta keteıik, TrustExam.ai — emtıhan ótkizýge jáne onyń nátıjeleriniń senimdiligin jasandy ıntellekt kómegimen baqylaýǵa arnalǵan platforma ázirleıtin qazaqstandyq tehnologııalyq kompanııa. Platformany memlekettik uıymdar, bilim berý mekemeleri jáne korporatıvtik tapsyrys berýshiler paıdalanady. Kompanııa BAÁ-de, Ulybrıtanııada, AQSh-ta, Kanadada jáne TMD elderinde jumys isteıdi.
Kompanııa málimetinshe, platformada 7 mıllıonnan astam emtıhan ótkizilgen. TrustExam Astana Hub Battle 2025 baıqaýynda Exponential Growth nomınatsııasy boıynsha, al AI SANA Generative Nation ulttyq baıqaýynda Best Startup AI Project nomınatsııasy boıynsha jeńimpaz atandy.
Buǵan deıin Túrki memleketteri aǵylshyn tilinen ortaq emtıhan ázirleıtinin jazǵanbyz.
