7 mamyrda QR Qarýly Kúshteriniń 25 jyldyǵyna arnalǵan erekshe áskerı parad ótedi
ASTANA. QazAqparat - 2017 jylǵy 7 mamyrda elimizdiń bas shahary - Astana qalasynda Qazaqstan Respýblıkasy Qarýly Kúshteriniń 25 jyldyǵyna arnalǵan áskerı parad ótedi. Jyldyń aýqymdy áskerı sharasyna keshendi daıyndyq bastalyp ta ketti. Paradty Elimizdiń Prezıdenti - Qarýly Kúshterdiń Bas qolbasshysy qabyldaıdy. Áskerı paradqa 5 myńnan astam adam, onyń ishinde 154 adamnan 27 jaıaý paradtyq eseptop qatysady.
Áskerı parad tartylǵan jeke quram jáne tehnıkalar sany boıynsha buryn ótkizilgen paradtardyń ishindegi eń irisi. 2017 jyly ótkiziletin paradtyń ereksheligi aýmaqtyq qorǵanys brıgadasynyń rotasyn, barlaý rotasy jáne elimizdiń 4 «Jas ulan» mektebinen qurama barabanshylar rotasynyń, sondaı-aq QR QM áskerı-tehnıkalyq mektebiniń tartylýy bolyp tabylady.
Egemendi Qazaqstannyń tarıhynda aıryqsha dataǵa, ıaǵnı, Qarýly Kúshterdiń qurylýynyń 25 jyldyǵyna tuspa-tus kelgen aldaǵy áskerı paradtyń ózindik erekshelikteri bar.
Bul áskerı parad - tartylǵan jeke quram jáne tehnıkalar sany boıynsha buryn ótkizilgen paradtardyń ishindegi eń irisi.
Kóztartarlyq sherýge 300-ge jýyq áskerı tehnıka tartylatyn bolady. Sondaı-aq, qazaqstandyq avıatsııanyń kók aspandaǵy qýaty 80 birlik avıatsııalyq tehnıka qatysady. Osy oraıda, qazaqstandyqtar paradta sý jańa áskerı tehnıkany, zamanaýı qarý-jaraq úlgilerin tamashalaı alady. Aıta keteıik, bul jap-jańa zamanaýı tehnıkalar men qarý-jaraqtar Qarýly Kúshterdiń arsenalyna 2016 jáne 2017 jyldary qosylǵan.
Sonymen qatar, alańda birinshi ret BPLA («Wing long», «Hermes-90» ı «Býsel»), gıdrotsıkl, kater, kvadratsıkl, baggı jáne «Djıgıt» zeńbirek qondyrǵylarynyń jańa úlgileri usynylady. Áýede qazaqstandyq avıatsııanyń kúshi men jaýyngerlik ázirligin 70 tik ushaq pen ushaqtar kórsetetin bolady. Birinshi ret «Hıýı» tik ushaǵy jáne TL-2000 jáne Zlin oqý-jattyqtyrý ushaqtary usynylatyn bolady.
Áskerı paradtyń taǵy bir ereksheligi - oǵan Qazaqstan Qarýly Kúshteriniń ardagerleri, «Jas ulan» áskerı mektepteriniń tárbıelenýshileri jáne aýmaqtyq qorǵanys brıgadasynyń rotasy qatysatyn bolady. Sondaı-aq, atalǵan sharaǵa áskerı-patrıottyq klýbtardyń tárbıelenýshileri men áskerı-tehnıkalyq mektepterdiń shákirtteri de qatysady dep kútilýde.
Osy jyldyń taǵy bir kezekti aýqymdy jáne mańyzdy is-sharalarynyń biri - Armııa halyqaralyq oıyndary. Armııa halyqaralyq oıyndarynyń 28 konkýrsy 5 el aýmaǵynda ótedi dep josparlanýda. Olar: Reseı, QHR, Qazaqstan, Ázerbaıjan jáne Belarýs. Qazaqstannyń áskerı qyzmetshileri 11 saıysta baq synasady. Oǵan qosa elimizdiń aýmaǵynda da úsh konkýrs ótetin bolady: «Artıllerııadan oq atý sheberi», «Mergender shebi» jáne «UUA esebiniń saıysy».
QR Qorǵanys mınıstrligi ókilderiniń sózderine súıinsek, mundaı aýqymdy saıystarǵa qatysý bizdiń áskerı qyzmetshilerimizdiń jaýyngerlik sheberligin shyndap, kásibıligin arttyrady, sondaı-aq, konkýrstardy elimizdiń aýmaǵynda ótkizý Qarýly Kúshterdiń jáne elimizdiń bedelin tanytyp, halyqaralyq deńgeıge kótermek.
Sonymen qatar, 2016 jyly «ArMI» oıyndarynda Qazaqstan respýblıkasynyń komandasy joǵary nátıje kórsetkenin aıta ketken jón. Bizdiń áskerı qyzmetshiler birneshe saıys túrlerinde ózderiniń kásibı sheberlikterin tanytyp alǵash ret qatysty. El Qarýly Kúshteriniń komandasy armııa oıyndarynda jeke quramnyń sany men saıystarǵa qatysýy boıynsha eń úzdik, top jarǵandardyń biri boldy.
