7 mamyrda Qarýly Kúshterdiń Jaýyngerlik parady ótedi
Úırenshikti áskerı paradta áskerı qyzmetshilerdiń saptyq daıyndyǵy jáne tehnıka men qarý-jaraqtyń keıbir úlgileri sandyq jaǵynan kórsetiledi. Jaýyngerlik paradta ofıtserler men sarbazdardyń kásibı daǵdysy, bólimshelerdiń is-qımyl tártibi, sondaı-aq Qazaqstan armııasynyń qaramaǵyndaǵy qazirgi zamanǵy qarý-jaraq pen áskerı tehnıkanyń jaýyngerlik múmkindigi kópshilik nazaryna usynylady.
2013 jylǵy 7 mamyrda Gvardııa garnızonynyń polıgonynda áskerı bólimsheler Qurlyq áskerleri men Áýe qorǵanysy kúshteriniń zamanaýı qarý-jaraq pen tehnıkany paıdalanýynyń múmkindikterin taktıkalyq jáne tájirıbelik turǵyda kórsetetin bolady. Sonymen birge Kaspıı akvatorııasyndaǵy Qazaqstan Áskerı-teńiz kúshteri kemeleriniń jaýyngerlik atysy onlaın-rejıminde taratylady.
Polıgonda Qurlyq áskerleriniń barlyq qarý-jaraq túrlerinen jaýyngerlik atystary júzege asyrylady. Qazaqstan Áskerı áýe kúshteriniń ushaqtary men tikushaqtarynan zymyrandar naqty túrde jiberilip, tájirıbe júzinde bombalaý qoldanylady, ushqyshtar ózderiniń joǵary sheberlikterin kórsetedi.
Elimizdiń Qarýly Kúshteriniń barlyq túrleri men tekteriniń jeke quramy qurlyqtaǵy, áýedegi jáne teńizdegi kásibı biliktilikterin tanytady. Munda ártúrli quramalardyń, sonyń ishinde barlaý jáne arnaıy maqsattaǵy áskerı bólimder men bólimshelerdiń ózara is-qımyly pash etiledi.
Ofıtserler men sarbazdar is júzinde Qarýly Kúshterdiń qatarynda naǵyz patrıottar men óz isiniń sheberleri qyzmet etetindigin jáne olardyń «Myqty armııa - myqty Qazaqstan!» uranymen Otanǵa qyzmet ete beretindigin dáleldemek.
7 mamyrda ótetin Jaýyngerlik paradtyń taǵy bir ereksheligi bul joly oǵan qatysatyn qarý-jaraq pen tehnıka túrleri ádettegiden aıtarlyqtaı kóp bolady. Mysaly, Jaýyngerlik paradqa qatysatyn áskerı ushaqtar men tikushaqtardyń jalpy sany - 86. Bul Qazaqstan Respýblıkasynyń Konstıtýtsııasy kúnine arnalǵan sońǵy paradqa qatysqan áýe kemelerinen eke ese kóp degen sóz.
Sonymen qatar, Jaýyngerlik parad sheńberinde qazirgi zamanǵa saı tehnıkalardyń, qarý-jaraqtardyń jáne qazaqstandyq qorǵanys ónerkásibi kesheniniń baılanys quraldary kórsetiledi.