7 mamyr – Otan qorǵaýshy kúni
ASTANA. QazAqparat – Búgin qazaqstandyqtar Otan qorǵaýshylar kúni meıramyn atap ótedi, dep habarlaıdy QazAqparat tilshisi.
1992 jyly 7 mamyrda Qazaqstan Respýblıkasynyń Prezıdentiniń Qarýly kúshterdi qurý týraly №745 Jarlyǵy jarııalandy. Jarlyqta otandyq qarýly kúshti qalyptastyryp, ol úshin tıisti jaǵdaı jasaý kerektigi aıtylǵan.
Bul – el tynyshtyǵyn qorǵap, beıbitshilikti qamtamasyz etetin áskerı qyzmetshilerdi quttyqtap, qurmet kórsetetin kún.
Aıta keteıik, Qazaqstan qarýly kúshter qatarynda er azamattarmen qatar, názik jandar da teńdeı qyzmet atqaryp keledi. Olardyń kópshiligi ofıtser ataǵyna ıe. Sondyqtan, Otan qorǵaýshylar kúni – qyz-kelinshekterdiń de merekesi.
Qazaqstan áskeri úsh túrli qurylymnan turady. Atap aıtqanda, qurlyq áskerleri, áýe qorǵanysy áskerleri jáne áskerı-teńiz kúshteri. Sonymen qatar, Qazaqstan Respýblıkasynyń Joǵarǵy bas qolbasshysy, Prezıdenttiń tikeleı baǵynysynda arnaıy daıyndalǵan aeroutqyr áskerleri bar. Olardyń maqsaty – tótenshe jaǵdaıda erekshe qupııa operatsııalardy júrgizý.
Ataýly kún qarsańynda eńbegi sińgen sala mamandaryna áskerı ataqtar berý jáne erekshe kózge túsken áskerı qyzmetshilerge nagradalar tapsyrý dástúrge aınalǵanyn atap ótý qajet.
Qazaqstandyq áskerı qyzmetshilerge qatysty birer kún buryn belgili bolǵan jaǵymdy jańalyq, keler jyldan bastap áskerı ataq úshin tólenetin jalaqy 30 paıyz ósedi.
«Bıyl áskerı ushqyshtardyń jalaqysy ortasha alǵanda 60 paıyzǵa ósedi. Osy saladaǵy oqytýshylar men dárigerlerdiń jalaqysy da kóbeıedi. Kelesi jyly áskerı ataq úshin tólenetin aılyqaqy 30 paıyzǵa artady. Áskerı qyzmetshilerdi zeınetaqymen qamtý máselesi de qaıta qaralyp jatyr. Serjanttardy, ofıtserlerdi áleýmettik qoldaý jumysy jalǵasady. Olar turmysyna alańdamaı, el qorǵaýǵa saqadaı saı bolýy kerek», - dedi Prezıdent 5 mamyrda elordada ótken búkilarmııalyq keńes otyrysynda.
Sondaı-aq, jyl saıynǵy dástúrge saı Memleket basshysy bıyl da birqatar áskerı qyzmetshini marapattady.
Aıta ketsek, Qorǵanys mınıstrligi 7 mamyr Otan qorǵaýshylar kúni jáne 9 mamyr Jeńis kúnine oraı áskerı sherýdiń ótpeıtinin habarlaǵan edi. Oǵan sebep – bıýdjet qarajatyn únemdeý. Degenmen, vedomstvodan atalǵan meıramǵa oraı, áskerı-patrıottyq is-sharalardyń josparlanǵany málim etildi.
Eske salaıyq, 5 mamyrda Memleket basshysy Qasym-Jomart Toqaevtyń qatysýymen búkilarmııalyq keńestiń otyrysy ótti.
Jıynda 7 mamyr – QR Qarýly Kúshteriniń qurylǵan kúni qarsańynda ótetin jıyn barysynda áskerı salany damytýǵa jáne ásker daıyndyǵyna, Qazaqstan armııasyn tehnologııalyq turǵyda jańǵyrtýǵa qatysty máseleler qarastyryldy.
Prezıdent búkilarmııalyq keńes barysynda qorǵanys salasyna qatysty birqatar máseleni kóterip, jańa mindetter júktedi.
«Jaý joq deme, jar astynda» degen sóz bar. Qazirgi kúrdeli kezeńde Armııanyń róli kúsheıe tústi. Armııa egemendigimizdi qorǵaýǵa árdaıym daıyn bolýy qajet. Onyń kásibı daıyndyǵy, zamanaýı qarý-jaraqpen, ozyq tehnologııamen jabdyqtalýy basty faktorǵa aınaldy. Áskerdiń bilikti bolýy jáne utqyrlyǵy urys nátıjesine tikeleı áser etedi. Armııa osy talapqa saı bolsa, óz mindetin oıdaǵydaı atqarady», - degen edi Qasym-Jomart Toqaev.
