7-Qysqy Azııalyq oıyndardyń alaýy Taldyqorǵanǵa jetti
TALDYQORǴAN. 26 qańtar. QazAqparat /Sandýǵash Dúısenova/ - Seısenbi kúni saǵat 20.00-de Óskemennen Taldyqorǵan qalasyna 7-Qysqy Azııalyq oıyndardyń alaýy jetkizildi.
Azıada alaýyn áýejaıda Almaty oblysynyń ákimi Serik Úmbetov, qala jurtshylyǵy jáne baspasóz ókilderi kútip aldy. Sol jerde ótken baspasóz máslıhatynda oblys ákiminiń orynbasary Ansar Musahanov alaýdyń Taldyqorǵanda úsh kún bolyp, 27 qańtar kúni, estafeta qala kóshelerimen júrip ótkennen keıin, ushaqpen Qaraǵandyǵa jetkiziletinin habarlady.
«Taldyqorǵanda Azıada alaýy «Halyq banki» aktsıonerlik qoǵamynyń jergilikti fılıalynda saqtalatyn bolady. Al kúndiz kez kelgen adam osynda kelip, osynaý qasıetti alaýdy kóre alady. Tipti eskertkishke sýretke túsýge de ruqsat etiledi», - dedi «Halyq banki» AQ Taldyqorǵan fılıalynyń dırektory Gúlmıra Ahmetova.
Almaty oblysynyń alaýgerleriniń qatarynda oblys ákimi Serik Úmbetov, Olımpıada oıyndarynyń kúmis júldegeri Ashat Jitkeev, erkin kúresten, dzıýdodan jáne grek-grım kúresinen Olımpıada oıyndarynyń qola júldegerleri Máýlen Mamyrov, Aıdyn Smaǵulov jáne Nurbaqyt Teńizbaev, aýyr atletıkadan álem chempıony Vladımır Sedov jáne t.b. bar.
Al 30 qańtar men 6 aqpan aralyǵynda Almaty men Astana qalalarynda ótetin Azıada oıyndaryna Almaty oblysynyń atynan bıatlonshylar - Vankýver Olımpıadasynyń kúmis júldegeri Elena Hrýstaleva men Dıas Keneshev, mánerlep syrǵanaýshy Abzal Raqymǵalıev qatysady.
