7- Qysqy Azııa oıyndarynyń Alaýy Astanaǵa jetkizildi
ASTANA. 29 qańtar. QazAqparat /Gúlmıra Álıakparova/ - Elimizdiń barlyq óńirlerin aralaǵan 7- Qysqy Azııa oıyndarynyń Alaýy Qaraǵandy oblysynyń Temirtaý qalasynan búgin keshqurym Astanaǵa jetkizilip, saqtaý úshin Beıbitshilik jáne kelisim saraıyna qoıyldy.
12 qańtar kúni Azııa Olımpıadalyq keńesiniń shtab-páteri ornalasqan Ál-Kýáıt qalasynda tutanǵan 7-Qysqy Azııa oıyndarynyń Alaýy 19 kún boıy Qazaqstannyń oblys ortalyqtaryn aralady. El óńirlerinde estafetanyń tasymaldanbaly ottyǵy saqtaýǵa «Halyq bankiniń» fılıaldaryna qoıylyp kelse, Astanada qasıetti Alaý kópultty Qazaqstannyń beıbitshiligi men tatýlyǵynyń sımvolyna aınalǵan Beıbitshilik jáne kelisim saraıyna qoıyldy.
Azıada Alaýynyń Ál-Kýáıtte tutanǵan sátinen bastap Astanaǵa deıingi saparynynyń basy-qasynda bolǵan Oıyndar men Estafetany uıymdastyrý jónindegi Astanalyq dırektsııa basshysynyń orynbasary Sársen Quranbektiń aıtýynsha, estafeta barlyq óńirlerde joǵary deńgeıde ótti. Oǵan tarıhı sátterdi tamashalaýǵa kelgen 100 myńǵa deıingi halyq sany dálel.
«Oıyndar uranynyń ózi «O, sport - sen beıbitshiliksiń», dep bastalady. Beıbitshilik jáne kelisim saraıy Elbasy N.Nazarbaevtyń bastamasymen salynǵan bolatyn. 7-Qysqy Azııa oıyndary da Prezıdentimizdiń uıytqy bolýymen qazaq jerinde ótkeli otyr. Eldiń túkpir-túkpirin aralap kelgen Alaýdyń mindeti halqymyzdy birlikke úndeý bolatyn. Sondyqtan Alaýdyń Beıbitshilik jáne kelisim saraıynda saqtalýy úlken maǵynalyq mańyzǵa ıe», - dedi ol.
Eske salaıyq, Alaý estafetasynyń elordadaǵy kezeńine 100 alaýger qatysady. Onyń júrip ótetin joly - 15,4 shaqyrym.
Alaýgerler Azıada alaýyn Astananyń eń kórikti jerlerimen alyp ótetin bolady. Estafetanyń birinshi kezeńi saǵat 30 qańtar kúni 12.00-de «Qazaq eli» monýmenti men Beıbitshlik jáne kelisim saraıynyń aldyndaǵy alańnan bastalyp, «Haıvıll» turǵyn úı kesheni, «Arqar» M-3 kópiri, mınıstrlikter úıi, Aq Orda, «Báıterek» monýmenti, Kólik jáne kommýnıkatsııa mınıstrligi, «Nur Astana» meshiti ǵımarattary ornalasqan kóshelermen júrip ótedi de Memlekettik rámizder alańyna kelip toqtaıdy.
Estafeta tehnıkalyq úzilisten keıin Astana ákimdigi ǵımaratynyń aldyndaǵy alańda saǵat 15.30-da qaıta jalǵasady. Alaýgerler Abaı dańǵyly arqyly Respýblıka kóshesine shyǵyp, Esil ózeniniń ústine túsedi. Odan keıin «Redısson SAS» qonaqúıiniń aldyndaǵy kópirge shyǵyp (Turan dańǵyly), «Han Shatyr» saýda, oıyn-saýyq keshenine kelip toqtaıdy.
Astanalyq estafetany tamashalaýǵa barlyǵy 50 myńǵa jýyq kórermen jınalady dep kútilýde.
Al saǵat 18.00-de «Astana-Arena» stadıonynda 7-Qysqy Azııa oıyndarynyń saltanatty ashylýy bastalady. Saltanatty rásimniń aıaqtalýyna qaraı, ıaǵnı saǵat 20.00-de Aq Azıadanyń basty qazandyǵyn jaǵý úshin Alaý «Han shatyrdan» «Astana-Arena» stadıonyna jetkiziledi. «Astana-Arena» stadıonynda Qysqy Azııa oıyndarynyń aıasynda eshbir oıyndar ótkizilmeıtindikten, resmı is-shara aıaqtalǵannan keıin, basty qazandyq kópshiliktiń nazaryna qoıylý úshin «Dýman» oıyn-saýyq kesheniniń aldynda salynǵan muz qalashyǵyna qoıylady.
