7-qysqy Azııa oıyndaryna kelýi josparlanǵan 10 myń sheteldik týrıstiń 5 myńy ǵana keldi - A.Qulnazarov
ASTANA. 10 naýryz. QazAqparat /Gúlmıra Álıakparova/ - 7-qysqy Azııa oıyndaryna kelýi josparlanǵan 10 myń sheteldik týrıstiń 5 myńy ǵana keldi.
Bul týraly búgin elordada ótken baspasóz máslıhatynda «2011 jylǵy 7-qysqy Azııa oıyndaryn uıymdastyrý komıtetiniń atqarýshy dırektsııasy» AQ prezıdenti Anatóli Qulnazarov málim etti.
Onyń atap kórsetkenindeı, Qazaqstanda baıraǵyn jelbiretken Qysqy Azıadany óz kózimen tamashalaý úshin 19 myń adam akkredıtatsııa jasatqan. «Shet elderdiń ózinen 10 myńnan astam týrıst keledi dep kútildi. Іs-júzinde olardyń sany 5 myń boldy. Ókinishke qaraı, kútilgendeı bolmady, «resmı» jaǵy basym boldy», - dedi ol.
Anatóli Qulnazarovtyń sózine qaraǵanda, Oıyndarǵa arab elderiniń ózinen 3-4 myń shamasynda qonaq keledi dep josparlandy. Atqarýshy dırektsııa olardyń tipti, aty-jónderine deıin tizip jazyp alǵan. Olarǵa Almaty men Astananyń meımanhanalarynan oryndar daıyndaldy. Ashylý saltanatyna qatysýdy qalaǵan soń, olardyń kirý bıletteri sońǵy ýaqytqa deıin satylmady. «Biz sońǵy ýaqytqa deıin Arab elinen charterlik reıspen qonaqtardyń kelýin tostyq», - deıdi ol.
Qulnazarovtyń sózine qaraǵanda, resmı tulǵalardy áýejaıdan kútip alý, olardy qajetti nysandarǵa deıin jetkizip salyp, erekshe qonaqjaılyq kórsetetin arnaıy kompanııa da qurý josparlanǵan kórinedi.
Atqarýshy dırektsııa prezıdenti sondaı-aq, Azııa oıyndarynyń ashylýy men jabylý saltanattaryna bıletterdiń satylym úrdisine qanaǵattanbaǵandyǵyn bildirdi. «Bıletterdiń satylymy nashar boldy. Almatyda Oıyndardyń jabylýy ótken B.Sholaq atyndaǵy saraıda shyǵys minbe dekoratsııalarmen jabyq turdy. Ashylýynda 30 myń bılettiń tek 18 myńy ǵana satyldy», - dedi ol.
