7-Qysqy Azııa oıyndaryna qatysatyn 168 sportshynyń 68-in «Dınamo» men AOSK ókilderi quraıdy
ALMATY. 20 qańtar. QazAqparat /Erlik Erjanuly/ - Almaty men Astana qalalarynda 30 qańtar men 6 aqpan aralyǵynda ótetin 7-Qysqy Azııa oıyndarynda el namysyn qorǵaıtyn ulttyq qurama sapyna sport qoǵamdarynyń da ókilderi enip otyr.
«85 jyldyq tarıhy bar «Dınamo» dene shynyqtyrý jáne sport qoǵamynan bul dodaǵa sporttyń 9 túrinen 43 sportshy qatyspaq. Olardyń 2-eýi taý shańǵysy men mánerlep syrǵanaýdan, 9-y shańǵy jarysy, tuǵyrdan shańǵymen sekirý jáne short-trekten, 5-eýi frıstaıldan, 6-aýy bıatlonnan, 7-eýi konkımen júgirýden, 14-i shaıbaly hokkeıden baq synaǵaly otyr. Jalpy, "Dınamo" sport qoǵamyndaǵylar sporttyń 25 túrimen aınalysady. Onyń 19-y jazǵy, 6-ýy qysqy sport túrleri", - deıdi "Dınamo" dene shynyqtyrý jáne sport qoǵamy Sport basqarmasynyń bastyǵy Nıkolaı Knıazev.
Armııashylardyń ortalyq sport klýby (AOSK) tóraǵasynyń orynbasary Almat Tájibaevtyń aıtýynsha, 1970 jyly qurylǵan QR Qorǵanys mınıstrliginiń Armııashylardyń ortalyq sport klýbynyń músheleri sporttyń 17 túrimen aınalysady. Olardyń 12-si jazǵy, 5-eýi qysqy sport túrleri. Qazaqstanda bıyl tuńǵysh ret ótkeli otyrǵan 7-Qysqy Azııa oıyndaryna armııashylar - bıatlon (6), taý shańǵysy (2), shańǵy jarysy (12), shańǵymen tuǵyrdan sekirý (2) jáne konkımen júgirýden (3) 25 sportshy qosqaly otyr
