7-qysqy Azııa oıyndaryn ótkizýge arnalǵan taýarlarǵa baj salyǵy salynbaıdy - Keden qyzmeti
ASTANA. 22 jeltoqsan. QazAqparat /Jasulan Amanbaıuly/ - Astana men Almaty qalalaryna ákelinetin 7-qysqy Azııa oıyndaryn ótkizýge arnalǵan taýarlarǵa baj salyǵy salynbaıdy.
Bul týraly búgin Astana qalasynyń Kedendik baqylaý departamentinde brokerlik kompanııalardyń qatysýymen ótken qoǵamdyq kosýltatıvtik keńeste Kedendik baqylaýdy uıymdastyrý basqarmasynyń bastyǵy Bıbolat Seıpilov aıtty.
«Búgingi ýaqytta Qysqy Azııa oıyndaryn ótkizý boıynsha daıyndyq jumystary aıaqtalýǵa jaqyn. Elordanyń kedendik qyzmeti shetel azamattaryn birinshi bolyp kútip alady. Kedendik baqylaý jáne rásimdeý sharalarynyń qanshalyqty yńǵaıly ári tıimdi ótýine qarap, olardyń Qazaqstan jónindegi alǵashqy pikiri qalyptasady. Kerek deseńizder, qysqy Azııa oıyndarynyń sapaly ótkizilýi jáne memleketimizidiń bedeli soǵan baılanysty», - deıdi B. Seıpilov.
Onyń aıtýynsha, aýyr júk, bagajdar jáne qol júkteri basymdyqty túrde rásimdeletin bolady. «Oǵan qosa, Kedendik odaqtyń joǵary organy bolyp tabylatyn Eýrazııalyq ekonomıkalyq qoǵamdastyqtyń Memleketaralyq keńesiniń sheshimi boıynsha, Astana men Almaty qalalaryna ákelinetin 7-qysqy Azııa oıyndaryn ótkizýge arnalǵan taýarlarǵa, aktsızdelgen taýarlardan basqasynyń barlyǵyna, kedendik baj salyǵy salynbaıdy», - dep atap kórsetti ol.
7-qysqy Azııa oıyndaryn ótkizý barysynda Astana qalasynda «Astana-kedendik rásimdeý ortalyǵy» jáne «Áýejaı-Astana» kedendik beketteriniń qyzmeti iske qosylady.
Soǵan oraı, elordanyń Kedendik baqylaý departamenti Azııa oıyndarynyń ótýi barysynda «Áýejaı-Astana» kedendik beketiniń kezekshilik aýysymynyń shtatyn kóbeıtý jáne ol jerlerde departament qyzmetkerleri ishinen jaýaptylardy taǵaıyndaý máseleleri sheshilgen.
