7-Qysqy Azııa oıyndary aıasynda ótetin Alaý estafetasynyń Astana qalasyndaǵy baǵyty anyqtaldy

Buǵan deıin habarlanǵandaı, Alaý estafetasyna árbir óńirden - 60, Almatyda - 80, al Astanadan - 100 alaýger qatysady. Estafeta baǵyty eki kezeńge bólindi.

Birinshi kezeńi túski saǵat 12.00-de Táýelsizdik kóshesinde ornalasqan «Qazaq eli» monýmentinen bastalady da, Táýelsizdik pen Baıtursynuly kósheleriniń qıylysy - Baıtursynuly men Qoshqarbaev kósheleriniń qıylysy - «Arqar» kópiri arqyly Orynbor-Qonaev kósheleriniń qıylysyna deıin - Orynbor kóshesinen «Aq Orda» aldyndaǵy alań arqyly - «Báıterek» monýmenti -Kólik jáne kommýnıkatsııa mınıstrligi - «Nur Astana» meshiti - Dostyq jáne Qabanbaı batyr kósheleri arqyly júrip ótip, Memlekettik rámizder alańyna kelip toqtaıdy. Baǵyttyń jalpy uzyndyǵy 8,2 shaqyrym, qatysýshy alaýgerlerdiń sany - 50.

Tehnıkalyq úzilisten keıin saǵat 15.30-da Astana ákimdigi ǵımaratynyń aldyndaǵy alańnan estafetanyń ekinshi kezeńi bastalady. Alaýgerler Abaı dańǵyly arqyly Respýblıka kóshesine shyǵyp, Esil ózeniniń ústine túsedi. Osy kezde kreatıvti kezeńder uıymdastyrylady dep kútilýde. Máselen, Azıada Alaýyn Esildiń ústimen shańǵyshylar, konkıshiler, kaskaderlar, qarda júretin mashınalar men morjdar alyp ótetin bolady. Odan keıin estafeta «Redısson SAS» qonaq úıiniń aldyndaǵy kópirge túsip (Turan dańǵyly), «Han Shatyr» saýda, oıyn-saýyq keshenine kelip toqtaıdy. Estafetanyń aıaqtalýyna oraı keshende úlken shoý-baǵdarlama ótedi. Ekinshi kezeńniń jalpy uzaqtyǵy - 2 saǵat, uzyndyǵy - 7,2 shaqyrym. Qatysýshy alaýgerler sany - 50.

Saǵat 18.00-de «Astana-Arena» stadıonynda 7-Qysqy Azııa oıyndarynyń saltanatty ashylýy bastalady. Saltanatty rásimniń aıaqtalýyna qaraı, ıaǵnı saǵat 20.00-de Aq Azıadanyń basty qazandyǵyn jaǵý úshin Alaý «Han shatyrdan» «Astana-Arena» stadıonyna jetkiziledi. «Astana-Arena» stadıonynda Qysqy Azııa oıyndarynyń aıasynda eshbir oıyndar ótkizilmeıtindikten, resmı is-shara aıaqtalǵannan keıin, basty qazandyq kópshiliktiń nazaryna qoıylý úshin «Dýman» oıyn-saýyq kesheniniń aldyndaǵy alańǵa qoıylady. Aıta keteıik, osy alańda Astanada buǵan deıin bolmaǵan etno-úlgidegi alyp muz qalashyǵy salynady.

Eske salaıyq, 7- Qysqy Azııa oıyndary Alaý estafetasynyń fakeli 11 qańtar kúni Azııa Olımpıadalyq keńesiniń shtab-páteri ornalasqan Ál-Kýáıt qalasynda tutandyrylyp, Oıyndardy uıymdastyrýshy Qazaqstannyń ókilderiniń birine tapsyrylady. 12 qańtar kúni Alaý ushaqpen Almaty qalasyna jetkiziledi. Osydan bastap onyń Qazaqstannyń óńirleri boıynsha saıahaty bastalady. Almatyda keıin alaý qutysy Taraz (13 qańtar), Shymkent (14 qańtar), Qyzylorda (15 qańtar), Aqtaý (16 qańtar), Atyraý (17 qańtar), Oral (18 qańtar), Aqtóbe (19 qańtar), Qostanaı (20 qańtar), Petropavl (21 qańtar), Kókshetaý (22-23 qańtar), Pavlodar (24 qańtar), Óskemen (25-26 qańtar), Taldyqorǵan (27 qańtar), Qaraǵandy (28-29 qańtar) jáne Astanaǵa (30) jetkiziledi.