7-Qysqy Azııa oıyndary Alaý estafetasynyń Astana qalasyndaǵy kezeńi bastaldy

29 qańtar kúni Azıada Alaýy qazaq eliniń tatýlyǵy men turaqtylyǵynyń sımvolyna aınalǵan Beıbitshilik jáne kelisim saraıyna saqtaýǵa qoıylǵan bolatyn. Búgin estafeta rásimi Azıada Alaýyn Beıbitshilik jáne kelisim saraıynan saltanatty jaǵdaıda alyp shyqqan ejelgi saq kıimindegi jaýyngerlerdiń sherýinen bastaldy. Jaýyngerlerdiń qolynan alaýdy salt atty 24 sarbaz qabyldap alyp, sahnaǵa ornatylǵan Ot tuǵyryna jetkizdi. Alaý jaǵylǵan soń saltanatty Prolog bastaldy.
Qoıylymdaǵy Prolog ıdeıasy - Ot ǵumyrynyń damý satylaryn beıneleý. "Ulytaý" toby A. Vıvaldıdiń «Qys» shyǵarmasyn oryndaǵannan keıin, kórermender ottyń jalynǵa aınalǵan teatrlandyrylǵan jáne mýzykalyq qoıylymyn tamashalady.

Qoıylym QR halyq ártisi R.Rymbaevanyń oryndaýyndaǵy Azıadaǵa arnalǵan fınaldyq ánmen aıaqtaldy.

Azıada Otyn jaǵý qurmeti belgili túrkitanýshy ǵalym, mádenıet jáne qoǵam qaıratkeri, QR Prezıdenttik mádenı ortalyǵynyń dırektory Myrzataı Joldasbekovke berildi.

Azıada Alaýynyń elordadaǵy kezeńin birinshi bolyp Astana qalasynyń ákimi Imanǵalı Tasmaǵambetov bastady. Qala basshysynan keıin Alaý qutysy bokstan halyqaralyq dárejedegi sport sheberi, bokstan ulttyq quramanyń kapıtany Nazgúl Boranbaevanyń qolyna ótti. Alaýgerlerdiń qatarynda sondaı-aq jastar arasyndaǵy shahmattan álem chempıony Dınara Sadýaqasova, Senat depýtaty Qýanysh Sultanov, ushqysh-ǵaryshker, Ulttyq ǵarysh agenttiginiń tóraǵasy Talǵat Musabaev, QR Boks federatsııasynyń tóraǵasy Tımýr Qulybaev, 5 jasar qyzdy ólim aýzynan qutqaryp qalyp, «Eren eńbegi úshin» medalimen marapattalǵan 13 jasar Jandos Іlııasov jáne t.b. bar.

«Men qobaljydym, óıtkeni bul óte qurmetti ári jaýapty is, ekinshi jaǵynan sen óz eliń úshin maqtanysh sezimine bólenesiń. Azıada - bul bizdiń ortaq úıimiz - Qazaqstanǵa kelgen úlken sport merekesi jáne biz bul zor synnan súrinbeı ótemiz» - dedi I.Tasmaǵambetov.

Astana ákimi Azııa oıyndarynyń ashylý saltanatynda tamasha shoý bolatynyna ýáde berdi. Onyń aıtýynsha, ol Qazaqstan tarıhy men mádenıetin barlyq jaǵynan pash etedi, jáne «bizdiń ultymyzdy barlyq álemge tanystyrady».

Estafetanyń 1 kezeńi túski saǵat 13.30-da Memlekettik rámizder alańynda aıaqtalady. Tehnıkalyq úzilisten keıin Astana ákimdiginiń aldyndaǵy alańnan saǵat 15.00-de qaıta bastalady.

Alaý estafetasy aıaqtalǵannan keıin Azıadanyń Alaý qutysy Oıyndardyń saltanatty ashylýy ótetin «Astana-Arena» stadıonyna jetkizilip, Aq Azıadanyń basty qazandyǵyn jaǵady. Osy sátten qazaq jerinde týyn jelbiretken 7-Qysqy Azııa oıyndary resmı túrde bastalady.