7-qysqy Azıada ótetin sporttyq nysandar sapaly uıaly baılanyspen qamtamasyz etildi - N. Eskova
ALMATY. 21 qańtar. QazAqparat /Ádilet Musahaev/ - Almatydaǵy 7-qysqy Azııa oıyndary ótetin sporttyq nysandar shetelden kelgen qonaqtar men barlyq jankúıerlerge sapaly uıaly baılanys pen jyldamdyǵy joǵary ınternet qyzmetin kórsetedi.
Bul jaıynda búgin GSM Qazaqstan/Kcell kompanııasynyń qoǵammen baılanys bóliminiń bas mamany Natalıa Eskova sport keshenderindegi baılanys quraldarynyń daıyndyǵyn BAQ ókilderine tanystyrý kezinde aıtty.
Atalǵan shara barysynda jýrnalıster «Medeý» muz aıdyny, Halyqaralyq shańǵymen tuǵyrdan sekirý kesheninde jáne Soldat saıda ornalasqan shańǵy-bıatlon stadıonynda bolyp, sporttyq nysandarda ornatylǵan jabdyqtarmen tanysyp, baılanys sapasyn tekserip kórdi.
N. Eskovanyń aıtýynsha, GSM Qazaqstan/Kcell kompanııasy Astana men Almatynyń Azıada nysandaryna 62 qosymsha bazalyq stansy ornatqan, ıaǵnı jeliler syıymdylyǵyn arttyrǵan. Bul oıyn kezindegi baılanysta týyndaýy múmkin aqýaldardyń aldyn alýǵa arnalǵan. «Qysqy Azııa oıyndary kezinde qonaqtar men janúıerlerge sapaly uıaly baılanys pen jedel uıaly ınternetten basqa, on-laın jańalyqtar, qońyraý úshin tegin áýender syndy ózekti de qyzyqty aqparat alý úshin qosymsha qyzmetter usynylatyn bolady», -deıdi N. Eskova.
GSM Qazaqstan/Kcell kompanııasynyń jelini optımızatsııalaý isi jónindegi ınjeneri Baqyt Zýpınov atalǵan sporttyq nysandarmen sheteldik qonaqtar jaıǵasatyn qonaqúılerdiń barlyǵy baılanystyń jańa standarty 3G men qamtamasyz etilgendigin aıtady. «Uıaly telefondary 3G baılanysyna qosylǵan adamdar bir-birin kóre alatyn beıneli qońyraý shala alady ári bul ınternet qyzmetiniń jyldamdyǵyn arttyrady», -deıdi B. Zýpınov.
3G baılanys túri keń kólemdi aqparattardy ınternet arqyly jyldam jiberýge kómektesedi, bul oıyn barysynda BAQ ókilderiniń aqparat berý jumysyn birshama jeńildeteri anyq.
