7 qazaqstandyq komanda startaptyq «Technation» konkýrsynyń irikteý týrynda jeńimpaz atandy (FOTO)
ASTANA. QazAqparat - TMD, Eýropa jáne Azııa memleketteriniń startap komandalary arasyndaǵy «Technation» akseleratsııalyq baǵdarlamalar irikteý týrynyń qorytyndylary jarııalandy.
Investıtsııalar jáne damý mınıstrligi men «Tehnologııalyq damý jónindegi ulttyq agenttik» AQ birlese uıymdastyrǵan sharada qazaqstandyq 7 komanda úzdik bolyp tanyldy. Bul týraly «Tehnologııalyq damý jónindegi ulttyq agenttik» baspasóz qyzmetinen habarlandy.
Sharanyń qorytyndysyna sáıkes, baǵdarlamanyń halyqaralyq sarapshylar komıssııasy úzdik startap-komandalardy anyqtady. Endi jeńimpaz komandalar AQSh-taǵy Kremnıı alqabynda 2015 jyldyń qazanynda ótetin jedel damý baǵdarlamasyna qatysatyn bolady. Jeńimpazdarǵa kelsek, bular - bizmo, indibo, mangýst, almacloud, CRM, almasales, fascallmanager, picvpic, crystal jobalaryn qamtyǵan 7 qazaqstandyq jáne 2 sheteldik komanda. Máselen, «Bizmo» jobasyn usynýshylar «B2B» platformasynda veb jáne mobıldi qurylǵylar arqyly satyp alýshylar men jetkizýshilerdi ońaı biriktire alady. Ol platforma satylymdy arttyrý jáne iskerlik ósimdi shapshańdatý úshin jetkizýshilerge satyp alýshylardy ońaı tabýǵa kómektesedi. Al «Indibo» jobasy bul modýldik robottardyń tutastaı tobyn quraıdy, olar balalardyń oılaý qabiletin damytyp, baǵdarlama jasaý, taktıldi oıyndar arqyly elektronıka men robotty tehnıkany damytýǵa septigin tıgizedi.
«Aıta keterligi, jaqsy jobalar kóp boldy, 40 komandanyń arasynan 7-ýin tańdap alý úshin halyqaralyq sarapshylar komıssııasyna da ońaı bolǵan joq. Degenmen, komıssııa árbir jobany birinshi kezekte álemdik aýqymdaǵy áleýettilik turǵysynan qarady. Endigi kezekte «Technation» baǵdarlamasy arqasynda jeńimpaz atanǵan komandalarǵa ózderin búkil álemge tanytý múmkindigi týyp otyr», - deıdi «Tehnologııalyq damý jónindegi ulttyq agenttik» AQ Basqarma tóraǵasynyń orynbasary Jumataı Sálimov.
Eske sala keteıik, 23 maýsym men 16 shilde aralyǵynda ótken «Technation» baǵdarlamasyna TMD, Eýropa men Azııa elderinen 345 ótinish tústi. Olar tórt basym baǵytty, atap aıtqanda mobıldik tehnologııa (36 joba), elektrondyq kommertsııa (28 joba), medıa-tehnologııa (9 joba) jáne tumandy esepteý (7 joba) baǵyttaryn qamtydy. Birinshi irikteý kezeńinde 80 startap-komanda qalyp, al kelesi kezeńde olardyń arasynan 40 komanda fınalǵa shyqqan bolatyn.
