7 elge áýe reısin ashý josparlanyp otyr – Almaz Ydyrysov

ASTANA. QazAqparat – Ótken jyly elimizdiń áýe kompanııalary 11 mln jolaýshy tasymaldady. Bul týraly Indýstrııa jáne ınfraqurylymdyq damý vıtse-mınıstri Almaz Ydyrysov aıtty, dep habarlaıdy QazAqparat tilshisi.

«2022 jyldyń qorytyndysynda azamattyq avıatsııa salasyndaǵy qazaqstandyq áýe kompanııalary tasymaldaǵan jolaýshylar sany 2021 jylmen salystyrǵanda 17 paıyzǵa artty. Qazaqstan táýelsizdigi jyldarynyń ishinde alǵash ret tasymaldanǵan jolaýshylar sany 10 mln adamnan asyp, 11 mln-ǵa jetti. Búginde jolaýshylar aǵyny qalpyna keldi jáne turaqty ósim kórsetip otyr», - dedi Almaz Ydyrysov Indýstrııa jáne ınfraqurylymdyq damý mınıstrliginiń keńeıtilgen alqa otyrysynda.

Onyń dereginshe, 109 baǵdar boıynsha 29 elge halyqaralyq áýe reısteri qalpyna keltirildi jáne ashyldy. Aptasyna 479 reıs jasalady. Ushýlardy 3 otandyq jáne 27 sheteldik áýe kompanııasy júzege asyrady.

«Chernogorııa, Malaızııa, Grekııaǵa áýe reısterin jańǵyrtý, Qytaı, Úndistan, Ózbekstanmen reıster jıiligin arttyrý jáne Izraılge, Qatarǵa, Túrkııaǵa, Pákistanǵa, Ázerbaıjanǵa, Tájikstanǵa, Saýd Arabııasyna reıster ashý josparlanyp otyr», - dedi ol.

Vıtse-mınıstrdiń dereginshe, áýe kemeleri parkin keńeıtý jumystary da júrgizilip jatyr. 2025 jylǵa deıin park 51 ushaqpen tolyqtyrylady. Onyń 14-i ótken jyly elimizge jetkizildi.