«7 bóshke» turǵyn úıinen shyqqan órt: Turǵyndar oqıǵanyń qalaı bolǵanyn aıtyp berdi
ASTANA. KAZINFORM – Elordada «7 bóshke» turǵyn úıiniń turǵyndary kópqabatty ǵımarattyń qasbetin sharpyǵan órtten aman qaldy. Olar órttiń shyǵýyna jylý ustaǵysh materıalǵa túsken temeki tuqyly sebep bolýy múmkin ekenin aıtady.
«7 bóshke» turǵyn úı kesheninen birneshe júzdegen metr jerden ótkir kúıik ıisi seziledi. Bul jerde túnde órt boldy. Ǵımarattyń qasbeti órtenip, qyzyl jalyn 6 men 16 qabat aralyǵyn sharpydy. Quqarýshylardyń dereginshe, órt sharpyǵan aýmaq shamamen 250 sharshy metrdi quraıdy.
Oqıǵa ornynda TJM, qala ákimdigi men polıtsııa ókilderi júr. Órt bolǵan túni birneshe órt sóndirý kóligi ǵımarattyń eki qaptalynan tilsiz jaýmen alysqan. 6 qabattan 16 qabatqa deıingi qasbet qara kúıeden kórinbeıdi.
- Nura aýdanynyń ákimdigi órtke baılanysty týyndaǵan barlyq problemaǵa kómek beretindigine ýáde etti. Bizdiń qonaqúıge ýaqytsha ornalastyrdy. Bul úıdiń jedelsatysy únemi problemaǵa tap bolady. Qudaıǵa shúkir, sol túni bári múltiksiz jumys istep turdy. Uıyqtap jatqanbyz, inimiz oıatpaǵanda taǵdyrymyz ne bolaryn eshkim de bilmeıdi, - dedi atalǵan úıde turatyn Aıgúl Ámrenova.
Osy úıdiń taǵy bir turǵyny zardap shegýshiler qonaqúıde bir kúnge ornalastyrǵanyn aıtqan edi. Alaıda, ákimdik barlyǵy jaǵdaıǵa baılanysty ekenin alǵa tartyp otyr.
Resmı derekke sáıkes, 100-ge jýyq turǵyn óz betinshe dalaǵa shyqty. TJD kúshteri 15 adamdy evakýatsııalady. Zardap shekkender joq.
- Astana qalasynyń ákimdigi qajet bolǵan jaǵdaıda turǵyndardy qala qonaqúılerine ýaqytsha ornalastyrýdy uıymdastyrady. Sonymen qatar, jan-jaqty kómek kórsetiledi. Sondaı-aq, zaqymdanǵan qasbet pen basqa da shyǵyndardy qalpyna keltirý jumystary jedel túrde bastalady, - dep málimdedi elorda ákimdiginen.
Turǵyndardyń paıymynsha, joǵary qabattan laqtyrylǵan temeki tuqyly jylýustaǵysh materıalǵa túsip, órt sondan shyqqan. Degenmen, tótenshe jaǵdaılar qyzmetinen ottyń tutanýyna ne túrtki bolǵanyna qatysty resmı qorytyndy joq. Sondyqtan bul nusqany jaýapty mamandar áli tyńǵylyqty tekseretin bolady.
Órt sóndirýshilerdiń deregine qaraǵanda, 14-qabat qatty zardap shekken. Onda órt páterlerdiń biriniń balkonyna ótip ketken.
Qazirgi ýaqytta oqıǵa ornynda sarapshylar jumys istep jatyr. órttiń naqty shyǵý sebebin komıssııa anyqtaıdy. Turǵyndar tótenshe jaǵdaıdan keıin úı bılik tarapynyń nazarynan tys qalmaıtyndyǵyna, al kináliler anyqtalyp, jaýapqa tartylatyndyǵyna úmit artady.
Osyǵan deıin Astanadaǵy «7 bochek» turǵyn úı kesheninen órt shyqqany týraly jazdyq.