7 balanyń anasy jastardy halyq sanyn ulǵaıtýǵa shaqyrdy - Jastar jyly

ASTANA. QazAqparat - Jastarymyz kópbalaly bolýdan qoryqpaýlary kerek. Bul týraly búgin «Táýelsizdik urpaqtary» Jastar jylynyń ashylýynda 7 balanyń anasy 26 jastaǵy Jazıra Turǵynova aıtty, dep habarlaıdy QazAqparat tilshisi.

«Dana halqymyzda «Bir qozy dúnıege kelse, bir tup jýsan artyq shyǵady» degen sóz bar. Meniń atym - Jazıra. Jasym 27-de, Túrkistan oblysynyń turǵynymyn. Allanyń qalaýymen 7 sábıimdi ómirge ákeldim. Ár balamnyń ómirge kelýimen qatar bizdiń úıde úlken qýanyshtar oryn alady. Balalarymnń kúlkisinen ómirge degen qushtarlyq alamyn. Qaziri tańda balalarymnyń úlkeni 11 jasta, ol meniń birinshi kómekshime aınaldy. Ata-babalarymyzdan mıras bolyp qalǵan osynaý baıtaq qazaq elimizde sábılerdiń kóp bolǵanyn qalaımyn», - dedi ol.

Jazıra Turǵynova ótken jyly Elbasynyń Jarlyǵymen Túrkistan oblysy qurylyp, ortalyǵy retinde Túrkistan qalasy bekigendigin atap ótti. Qazirgi tańda oblys ortalyǵy úlken qurylys alańyna aınalyp, memlekettik nysandar men balabaqshalar, sport, densaýlyq saqtaý nysandary, mektepter salynyp jatqanyn aıtty.

«Men búldirshinderimniń keleshegine senimdimin. Elimizdiń jastaryn kópbalaly bolýdan qoryqpaýǵa shaqyramyn. Ár bala óz nesibesimen keledi», - dedi Jazıra Turǵynova.

Aıta keteıik, Astanada «Táýelsizdiktiń urpaqtary» ataýymen Jastar jylynyń ashylý saltanaty ótip jatyr.

Sharaǵa Úkimet músheleri, QR Parlamenti depýtattary, jergilikti atqarýshy organ basshylary, QR Prezıdenti janyndaǵy Jastar saıasaty keńesiniń músheleri, «100 jańa esim» baıqaýynyń jeńimpazdary, «Bolashaq» baǵdarlamasynyń túlekteri, jas ǵalymdar qatysýda. Sonymen qatar bul jıynǵa shyǵarmashylyq, stýdenttik jáne jumysshy jastar ókilderi, jas sportshylar, daryndy balalar, zamanaýı medıa salasynyń ókilderi, balalar úıiniń tárbıelenýshileri men túlekteri, jas áskerı qyzmetshiler keldi.

Eske sala ketsek, QR Prezıdenti Nursultan Nazarbaev Qazaqstan halqyna ótken jylǵy Joldaýynda 2019 jyldy Jastar jyly dep jarııalaýdy usynǵan bolatyn.

Prezıdent óz sózinde jastardyń barlyq sanatyn qoldaýǵa arnalǵan sharalardy tolyq qamtıtyn áleýmettik satynyń aýqymdy platformasyn qalyptastyrý kerektigin aıttty. Al, arada bir aıdan astam ýaqyt ótkende Elbasy Jarlyǵymen 2019 jyl Jastar jyly dep jarııalandy.