7 aıdyń qorytyndysy boıynsha jalpy ishki ónim ósimi 7,9 paıyzdy qurady - Statıstıka agenttigi
ASTANA. Qyrkúıektiń 13-i. QazAqparat /Marlan Jıembaı/ - 7 aıdyń qorytyndysy boıynsha jalpy ishki ónim ósimi 7,9 paıyzdy qurady. Bul týraly búgin elordada elimizdiń aǵymdaǵy jyldyń qańtar-tamyz aılaryndaǵy áleýmettik-ekonomıkalyq damýynyń qysqasha qorytyndylaryna arnalǵan baspasóz máslıhaty barysynda QR Statıstıka agenttiginiń tóraǵasy Álıhan Smaıylov málim etti.
Onyń atap ótýinshe, elimizdiń áleýmettik-ekonomıkalyq damýynyń oń órleý qarqyny kúsheıgeni baıqalyp otyr. Oǵan jalpy ishki ónimniń turaqty ósý qarqynynyń saqtalýy, ınfılııatsııanyń tómendigi, halyqtyń naqty aqshalaı tabystaryń ósýi, jumyssyzdyq deńgeıiniń tómendeýi sebep bolýda.
Baspasóz máslıhaty barysynda naqty kórsetkishterge toqtalǵan Á.Smaıylovtyń aıtýyna qaraǵanda, respýblıkanyń qysqa merzimdi ekonomıkalyq ındıkatory aǵymdaǵy jyldyń qańtar-tamyz aılarynda 109 paıyzdy quraǵan. Bul oraıda aǵymdaǵy jyldyń 1-shi jartyjyldyǵynda Qazaqstannyń jalpy ishki ónimi 108 paıyzdy quraǵandyǵyn eske salǵan ol «al 7 aıdyń qorytyndysy boıynsha JІÓ-niń ósimi 7,9 paıyzdy qurady jáne osy 8 aıdyń qorytyndysyn alatyn bolsaq, qysqa merzimdi ekonomıkalyq ındıkatordyń 109 paıyzǵa óskenin baıqaýǵa bolady. Demek JІÓ-niń joǵary ósý qarqyny saqtaldy», dedi
