7 aıda elimizde 61 308 baspana paıdalanýǵa berildi - Beıbit Atamqulov

NUR-SULTAN. QazAqparat - 2020 jyldyń 7 aıynyń qorytyndysynda elimizde 61 308 baspana paıdalanýǵa berildi. Bul týraly Úkimet otyrysynda QR Indýstrııa jáne ınfraqurylymdyq damý mınıstri Beıbit Atamqulov aıtty, dep habarlaıdy QazAqparat tilshisi.

«Qurylys salasynda naqty kólem ındeksi 2020 jyldyń qantar-shilde aılarynda 106,3 paıyzdy qurady. Ósim óńirlerde qurylys-montajdaý jumystaryn qaıta jańǵyrtýǵa baılanysty qurylys kólemin arttyrý esebinen qamtamasyz etiledi. 16 óńirde oń dınamıka baıqalady», - dedi ol.

Mınıstrdiń aıtýynsha, turǵyn úı qurylysy salasyndaǵy 7 aıdyń qorytyndysynda 6 mln 9 myń sharshy metr turǵyn úı paıdalanýǵa berilgen. Bul ótken jyldyń sáıkes kezeńimen salystyrǵanda 107,5 paıyz kóp.

«Respýblıka boıynsha barlyǵy 61 308 baspana paıdalanýǵa berildi. Turǵyn úıdi paıdalanýǵa berý kóleminiń artýy respýblıkanyń 15 óńirde tirkelgen. Kópqabatty jáne jeke turǵyn úıler salý kóleminiń tómendeýi saldarynan Atyraý jáne Túrkistan oblystarynda tómendeý baıqalady», - dedi Beıbit Atamqulov.

Onyń dereginshe, bıyl «Nurly jer» baǵdarlamasy boıynsha 15 mln sharshy metr turǵyn úı salý josparlanyp otyr.

«Osy josparǵa qol jetkizý úshin óńirlerge sáýir aıynda áleýmettik kredıttik turǵyn úıdiń 15 myń páteriniń qurylysyna qosymsha 180 mlrd teńge bólindi», - dedi ol.