7 aıda 90 bala jol apatynan kóz jumdy - QR ІІM
NUR-SULTAN. QazAqparat – Jyl basynan beri jol-kólik oqıǵasynan 1860 bala jaraqat alyp, 90 bala qaza tapqan, dep habarlaıdy QazAqparat tilshisi.
Bul týraly ІІM Ákimshilik polıtsııa komıteti tóraǵasynyń orynbasary Jandos Muratálıev málim etti.
«Balalardyń jolaýshy ǵana emes, jaıaý júrginshi ekenin de eskerý qajet. Bul rette jaıaý júrginshilerdiń kinásinen bolatyn jol-kólik oqıǵalarynyń negizgi sebepteri – joldy belgilenbegen jerden kesip ótý, baǵdarshamnyń «qyzyl» túsine ótý, jaqyndap qalǵan kóliktiń aldynan kesip ótý sııaqty áreketter. Mysaly, kámeletke tolmaǵandardyń kinásinen bıylǵy 7 aıda 60-tan astam jol-kólik oqıǵasy tirkelip, 5 bala qaza boldy, 70 jasóspirim túrli jaraqat alǵan», - dedi komıtet basshysynyń orynbasary ІІM aqparat alańynda.
Onyń aıtýynsha, jyl basynan beri respýblıka joldarynda kámeletke tolmaǵandardyń qatysýymen 1 621 jol-kólik oqıǵasy tirkelgen (+33%). Saldarynan 90 jasóspirim qaza bolyp (+18%), 1 860 bala jaraqat alǵan (+37%).
«Ótken jyldyń esepti kezeńimen salystyrǵanda jol-kólik oqıǵasynyń sany 15%, qaza bolǵandardyń sany 18% jáne jaraqat alǵandardyń sany 16% ósti. Zardap shekken balalardyń jartysynan kóbi –jolaýshylar. Demek, kóp jaǵdaıda eresekter balalardy kólikpen alyp júrýdiń erejesin jıi buzady – balalardy arnaıy ustaý quralynsyz nemese beldikti bekitpeı tasymaldaǵan», - dedi ІІM Ákimshilik polıtsııa komıteti tóraǵasynyń orynbasary Jandos Muratálıev.
