7 aıda 5 myńnan astam esirtki qylmysy anyqtaldy — Bas prokýratýrada
ASTANA. KAZINFORM - Qazaqstan Respýblıkasynyń Zańdylyqty, quqyqtyq tártipti jáne qylmysqa qarsy kúresti qamtamasyz etý jónindegi úılestirý keńesinde esirtki qylmysyna qarsy is-qımyl máseleleri boıynsha sharalar ázirlendi.
Іs-sharaǵa Prezıdent Ákimshiliginiń ókilderi, memlekettik organdardyń basshylary jáne basqa da múddeli adamdar qatysty.
Qadaǵalaý organynyń basshysy B.Asylov atap ótkendeı, memlekettik apparat nashaqorlyq pen esirtki bıznesine qarsy kúres salasynda, onyń ishinde 2023-2025 jyldarǵa arnalǵan Esirtkige qarsy kúrestiń keshendi jospary aıasynda aýqymdy jumystar atqarýda.
Aǵymdaǵy jyldyń 7 aıynda anyqtalǵan 5 myńnan astam esirtki qylmysynyń 1,5 myńǵa jýyǵy ony satýmen baılanysty bolǵan.
Qylmystyq jaýaptylyqqa tartylǵan 3 myńǵa jýyq adamnyń 700-i esirtki satqan.
Aınalymnan tárkilengen 20 tonnadan astam esirtkiniń 840 kılogrammy – «sıntetıka».
22 halyqaralyq jáne 85 aımaqtyq esirtki arnalarynyń joly kesilgen.
Osy baǵytta qabyldanyp jatqan sharalardyń tıimdiligin arttyrý maqsatynda Prezıdent Ákimshiliginiń tapsyrmasy boıynsha kúshtik organdardy baǵalaýdyń jańa júıesi ázirlendi.
Ol quqyq qorǵaý organdary jumysynyń negizgi kórsetkishteri men halyqtyń nashaqorlyqqa táýeldiligi máselesi jóninde sotsıologııalyq zertteýlerdiń nátıjeleri boıynsha júrgiziletin bolady.
Bul rette baǵalaýmen jeke organ emes, búkil óńir qamtylady, bul jergilikti atqarýshy jáne quqyq qorǵaý organdarynyń kúsh–jigerin biriktirýge baǵyttylǵan.
Bul sharalar oblys ákimderi men aýmaqtyq quqyq qorǵaý organdary basshylarynyń esirtki jaǵdaıy úshin jaýapkershiligin arttyrady.
Úılestirý keńesinde sıntetıkalyq esirtki óndirisinde qoldanylatyn hımııalyq zattardy elimizge alyp kirýge baqylaýdy kúsheıtý sharalary usynyldy.
Osy maqsatta prekýrsorlardy monıtorıngileý jáne baqylaý úshin Ulttyq vedomstvoaralyq «Targetıng ortalyǵyn» qurý (AQSh pen Lıtva tájirıbesi negizinde) máselesi pysyqtalatyn bolady.
Targetıng ortalyǵy aqparattyq-saraptamalyq hab qyzmetin atqarady dep kútilýde.
Keńeste áleýmettik jelilerdegi zańsyz kontentti buǵattaý protsesterin tsıfrlandyrý boıynsha memlekettik organdardyń ózara is-qımyly máseleleri jeke talqylandy.
Otyrys qorytyndysy boıynsha esirtki jarnamasynyń aldyn alý, esirtkige táýeldi adamdardyń esebin jetildirý, olardy emdeý hattamalaryn ózgertý, medıtsınalyq kómektiń qoljetimdiligin, sapasy men anonımdiligin arttyrý maqsatynda birqatar naqty usynymdar ázirlendi.
