7 adamdy órtten qutqarǵan qostanaılyq marapattaldy
QOSTANAI. QazAqparat - Lısakov qalasynyń ákimi Almat Ysmaǵulov órt kezinde 7 adamnyń ómirin aman saqtap qalǵan Nagmar Erdáýletovti marapattady, dep habarlaıdy QazAqparat.
Órt 11 naýryz kúni Lısakov qalasyndaǵy 1-shi shaǵyn aýdanda bolǵan. Saǵat 20:20-da Qostanaı oblysy TJD órtke qarsy qyzmet pýltine bes qabatty turǵyn úıden órt shyqqany týraly habarlama kelip túsedi. Oqıǵa ornyna kelgen órt sóndirýshiler avtosaty arqyly 5 adamdy qutqardy. Taǵy 20 adam evakýatsııalandy. Onyń ishinde tórteýi - bala. Alaıda, órt ornynan 1968 jyly týǵan er adamnyń máıiti tabyldy.
Sol kúni Nagmar Erdáýletov jumysynan úıine qaıtyp kele jatqan. Ol kórshi kireberiste qutqarý jumystary júrip jatqanyn baıqaıdy.
«3 jáne 4 qabattaǵy balkonda turǵan adamdardyń kómekke shaqyrǵan daýystaryn estidim. Buryn órt sóndirýshi bolǵanmyn. Birneshe jyldyq tájirıbem bar. Avtosaty arqyly qutqarý jumystaryn júrgizip jatqan áriptesterge kómekke keldim. 4-shi qabatqa deıin ózim shyqtym, páter ishindegi adamdarǵa órt sóndirýshi beldigin taǵyp, tómengi qabatqa deıin kezek-kezek túsirdim», - dep eske alady Nagmar Erdáýletov.
Keıin belgili bolǵandaı, Nagmar Erdáýletov órtten 7 adamdy qutqarǵan. Olardyń arasynda balalar da bar.
Nagmar Erdáýletov qazir qala ákimdigi janyndaǵy jumyldyrý daıyndyǵy jáne terrorızmniń aldyn alý bóliminiń basshysy qyzmetinde. Lısakov qalasynyń ákimi qyzmetkerdiń osy erligin eskerip, batyldyǵy úshin arnaıy gramota jáne syılyqpen marapattady.
