7-8 synyp oqýshylarynyń da esirtki tutynatyny anyqtalyp jatyr – Іshki ister mınıstri

PETROPAVL. QazAqparat – QR Іshki ister mınıstri Marat Ahmetjanov Soltústik Qazaqstan oblysy turǵyndarymen kezdesý barysynda esirtki qylmysyna toqtalyp, nashaqorlyq máselesin kóterdi, dep habarlaıdy QazAqparat tilshisi.

QR Іshki ister mınıstri Marat Ahmetjanovtyń aıtýynsha, elimiz boıynsha 2 myńǵa jýyq esirtki qylmysy anyqtalyp, 11 tonna esirtki tárkilendi.

36 esirtki zerthanasy men prıtondar joıyldy. 212 kg sıntetıka tárkilendi.

«SQO-da 415 kg esirtki tárkilendi, onyń 2,2 kg sıntetıka. 1 zerthana joıyldy. 94 esirtki saıty buǵattaldy.

Ókinishke oraı, eldegi esirtkige táýeldi adamdar sany týraly naqty jáne senimdi aqparat joq. Resmı statıstıka boıynsha olardyń sany jyl saıyn azaıyp keledi. Biraq, bul shyndyqqa sáıkes kelmeıdi.

Sarapshylardyń baǵalaýy boıynsha nashaqorlardyń sany is júzinde 5 ese kóp. Búgin «sıntetıka» tez taralyp jatyr. Kóptegen adam bul máseleniń olarǵa qatysy joq dep oılaıdy. Olar nashaqorlyqtyń qoǵamda qanshalyqty tamyr jaıǵanyn bilmeıdi. Búgin tipti 7-8 synyp oqýshylarynyń da esirtki tutynatyn jaǵdaılary anyqtalyp jatyr. Bul ulttyq qaýipsizdikke, ulttyń genofondyna qaýip tóndiredi», - dedi MaratAhmetjanov.

Mınıstrdiń aıtýynsha, Memleket basshysynyń sońǵy Joldaýy aıasynda mınıstrlik keshendi jospardy ázirleýge kiristi. Nátıjesinde esirtkige qarsy ýákiletti organ retinde Іshki ister mınıstrliginiń úılestirý quzyretin kúsheıtý, jańadan shyǵyp jatqan «sıntetıkany» jedel túrde esirtki tobyna qosý jáne medıtsınalyq esepke alýdy jetildirý sharalaryn qabyldaý josparlanǵan.