7,5 myńnan astam shekarashy qyzmettik baspanasyz júr - UQK Shekara qyzmeti
ASTANA. 21 qarasha. QazAqparat - Búgingi tańda elimizde 7,5 myńnan astam shekarashy qyzmettik baspanasyz júr.
Bul týraly Májilistiń jalpy otyrysynda «Qazaqstan Respýblıkasynyń Memlekettik shekarasy týraly» zań jobasyn talqylaý barysynda QR Ulttyq qaýipsizdik komıteti Shekara qyzmeti dırektorynyń mindetin ýaqytsha atqarýshy Turǵanbek Stambekov málim etti.
UQK ókiliniń aıtýynsha, qazirgi tańda elimizdiń shekara qyzmeti salasynda áleýmettik máseleler keıinge ysyrmaı, shuǵyl sheshýdi talap etedi. «Ondaı áleýmettik máselelerdi sheshý tek shekarany jaılastyrý, shekara mańyn tehnıkalyq jabdyqtaý máselelerimen shektelip qalmaıdy, onyń ishinde asa ózekti problema páterlermen qamtamasyz etýge kelip tireledi. Máselen, búgingi tańda 7,5 myńnan astam shekarashy qyzmettik baspanany qajet etedi», - dedi T. Stambekov. Onyń sózine qaraǵanda, Qazaqstan-Qytaı shekara ýchaskelerindegi shekaralyq zastavalardyń basym kópshilik ǵımarattary men nysandary ótken ǵasyrda salynǵan.
«Degenmen, biz salalyq baǵdarlamany ázirleý barysynda ondaı problemalardyń barlyǵyn eskerdik. 2020 jylǵa deıingi baǵdarlamada shekaralardy jaılastyrý, onyń ishinde sol mańnan qyzmetkerler úshin baspanalar salý máseleleri qamtyldy», - dedi dırektordyń mindetin atqarýshy.
Budan bólek, UQK ókili shekara qyzmetiniń aǵymdaǵy jyly Almaty, Jambyl, Ońtústik Qazaqstan oblystarynda 10 jańa zastava sala bastaǵanyn da atap ótti.
