7,3 myń sheteldik Qazaqstanda zańsyz júrgen

ASTANA. QazAqparat – QR Іshki ister mınıstrligi eldegi kóshi-qon zańnamasynyń saqtalýyn tekserip, jedel-aldyn alý sharasyn ótkizdi, dep habarlaıdy QazAqparat.

Polıtsııa sheteldikterdiń turatyn jerlerin, qurylys nysandaryn, bazarlardy, sheteldikterdi jaldaıtyn uıymdar men jumys berýshilerdi tekserdi.

«Operatsııanyń 6 kúninde kóshi-qon zańnamasynyń 11 myń buzýshylyǵy anyqtaldy. Onyń ishinde 7331 sheteldik elde bolý merzimin buzǵan, sheteldikterdiń eńbek qyzmetin zańsyz júzege asyrýdyń 2400 faktisi tirkelip, 507 jumys berýshi sheteldik jumys kúshin zańsyz paıdalanǵany úshin ákimshilik jaýapqa tartyldy. Ózderine kelgen sheteldikter týraly polıtsııany ýaqtyly habardar etpegeni úshin 2536 jeke jáne zańdy tulǵa jaýapqa tartyldy», - dedi QR Іshki ister mınıstrligi baspasóz qyzmetiniń ókili Shuǵyla Turlybek aptalyq brıfıngte.

Vedomstvo ókili sheteldikterdi qabyldaýshy tarap ózderine kelgen sheteldik týraly ishki ister organdaryna habarlaýǵa mindetti ekenin eske saldy.