7-20-25: Jas otbasylarǵa alǵashqy jarnanyń jartysy qaıtarylady
«Nur Otan» partııasy fraktsııasynyń músheleri: Irına Aronova, Asylbek Smaǵulov, Vasılıı Oleınık, Sergeı Sımonov, Álııa Saparovalar aldymen qaladaǵy «ıÝbıleınyı» shaǵynaýdanyndaǵy qurylys barysymen tanysty. Qostanaı qalasy ákiminiń orynbasary Aıdar Qusaıynovtyń sózinshe, qazirgi ýaqytta atalǵan shaǵynaýdanda 2172 páterli 25 úıdiń qurylysy júrip jatyr. Jyl sońyna deıin taǵy 600 páter paıdalanýǵa beriledi.
«Qurylys jumystarynda 380 adam jumys isteýde. Aldaǵy ýaqytta munda turǵyndarǵa qajetti áleýmettik nysandar: 280 oryndyq 2 balabaqsha, 1200 oryndyq mektep, emhana, muz saraıy, ulttyq mádenıet ortalyq, smart-ortalyq jáne qonaqúı salynady. Páterlerdiń deni «7-20-25» baǵdarlamasy sheńberinde satylady. Búginde 43 ótinim tústi. Olarǵa jeltoqsan aıynyń basynda páter kiltteri tapsyrylady. Barlyǵy 400 otbasy «7-20-25» arqyly qonys toıyn toılaıdy», - dedi Aıdar Qusaıynov.
Depýtattar nysandy josparlanǵan merzimde salyp bitirip, ýaqytynda tapsyrý qajettigin atap ótti. Qurylys jumystaryn kesheýildetýge eshqandaı negiz joqtyǵyn da aıtty. Sebebi, baspanaǵa muqtaj jandardyń qajettiligin óteý mańyzdy jumys. Sondaı-aq páterlerdiń baǵasyna, bólmelerdiń sharshy kólemine, jylý maýsymyna daıyndyq jaıyna alańdaýshylyq bildirdi.
«Elbasynyń «7-20-25» baǵdarlamasynyń arqasynda túrli mamandyq ıeleri ózderiniń alǵashqy úılerin alyp jatyr. Bul úlken qýanysh. Búginderi «Prezıdenttiń 5 áleýmettik bastamasy» Qazaqstanda belsendi túrde iske asyrylýda. Sondyqtan Elbasy bıylǵy Joldaýynda bes bastamanyń mańyzdy rólin atap ótti. Turǵyn úı baǵdarlamasynyń iske asýyn jedeldetý úshin naryqta turǵyn úılerdi kóbeıtý qajet», - dedi «Nur Otan» partııasynyń múshesi Asylbek Smaǵulov.
Halyq qalaýlylary «7-20-25» baǵdarlamasynyń Qostanaı oblysynda endi ǵana iske asyrylyp jatqanyn aıtty. Bul baǵdarlama boıynsha ákimdikterge bastapqy jarnalardy jergilikti bıýdjet esebinen ishinara sýbsıdııalaý tetikterin qarastyrý tapsyrylǵan-dy. Endi jas otbasylar men bıýdjettik sala qyzmetkerlerine alǵashqy jarnanyń jartysy qaıtaryp berilmek. Osy máseleni N.Nazarbaev bıylǵy Joldaýynda aımaq basshylarynyń aldyna qoıdy. Qoljetimdi jalǵa beriletin turǵyn úılerdiń qurylysyn júrgizip, eń aldymen dárigerlerdiń, muǵalimderdiń, áleýmettik jáne ózge salanyń bilikti mamandaryna jergilikti bıýdjet esebinen jeńildetilgen ıpoteka boıynsha alǵashqy jarnasyn ishinara sýbsıdııalaý máselesin shegine jetkizý júkteldi.
«Búgin biz «ıÝbıleınyı» shaǵynaýdanyndaǵy qurylys barysymen tanystyq. Prezıdenttiń turǵyn úı qurylysyn damytýdy qoldaý jónindegi Joldaýda ataǵan tapsyrmalaryn iske asyrý Qostanaıda qarqynmen júrgizilip otyrǵany kórinip tur. Oblysta «7-20-25» baǵdarlamasyna suranysty arttyrý úshin qurlys kompanııalardyń sanyn kóbeıtý de mańyzdy. Sebebi, qazirgi tańda qurylysqa arnalǵan qarjylyq qoldaýlar kóp. Naryqta báseke artqan saıyn páterdi tómen baǵamen satyp alýǵa múmkindik týady», - dep atap ótti májilismen Sergeı Sımanov.
Elbasy tapsyrmasyna sáıkes, turǵyn úı qurylysy boıynsha baǵdarlamany iske qosý 5 jyldyń ishinde 650 myń otbasynyń nemese 2 mıllıon adamnyń baspana máselesin sheshýge múmkindik beredi.
