«7-20-25» jáne «Baspana Hıt» baǵdarlamasymen qansha azamat úıli boldy

NUR-SULTAN. QazAqparat – Memleket basshysynyń daǵdarysqa qarsy bastamalaryn iske asyrý sharalary jalǵasyp jatyr. Bul týraly QR Ulttyq bank tóraǵasy Erbolat Dosaev málim etti, dep habarlaıdy QazAqparat tilshisi.

«Ekonomıkany qoldaý aıasynda Memleket basshysynyń daǵdarysqa qarsy bastamalaryn iske asyrý jalǵasýda. «Qarapaıym zattar ekonomıkasy» baǵdarlamasy turǵysynda bıylǵy 7 tamyzdaǵy jaǵdaı boıynsha bankter jalpy somasy 454,3 mlrd teńgege 618 ótinimdi maquldap, 266,6 mlrd teńge somasyna 536 qaryz berdi», - dedi UB basshysy Úkimet otyrysynda.

Budan bólek, tótenshe jaǵdaıdyń engizilýinen zardap shekken shaǵyn jáne orta bıznes sýbektilerin jeńildikpen kredıtteý baǵdarlamasy aıasynda bıylǵy 6 tamyzdaǵy jaǵdaı boıynsha kásipkerler 535,9 mlrd teńge somasyna 2 207 ótinim berdi. Osy oraıda 341,4 mlrd teńgege 1 279 nesıe berildi.

«Al «7-20-25» baǵdarlamasy turǵysynda osy jylǵy 6 tamyzdaǵy jaǵdaı boıynsha 240,7 mlrd teńgege 20 693 ótinim maquldandy, onyń ishinde 199,3 mlrd teńge somasyna 16 868 qaryz berildi.

«Baspana Hıt» naryqtyq ıpotekalyq baǵdarlama aıasynda 6 tamyzdaǵy jaǵdaı boıynsha 296,4 mlrd teńge somasyna 34 904 ótinim maquldandy. Onyń ishinde 235,6 mlrd teńgege 28 347 nesıe berildi», - dedi E. Dosaev.