7-20-25: Jambylda páter alýǵa múmkindigi bar azamattar sany 3 ese artty
Joldaýdyń ómir súrýge jaıly orta qalyptastyrý basymdyǵy boıynsha jáne Elbasynyń «Bes áleýmettik bastamasynyń» birinshi baǵyty aıasynda Jambyl oblysynda birqatar jobalar iske asyrylýda.
«Búginde Taraz qalasyndaǵy qajetti ınfraqurylymmen qamtamasyz etilgen 462 ga jer teliminde jańa eki móltek aýdandarynyń qurylysy bastaldy. Atalǵan aýdandarda «7-20-25» baǵdarlamasy aıasynda usynylatyn 480 kóp qabatty jáne 969 jeke turǵyn úı qurylystary bastalyp, aǵymdaǵy jyly 10 kóppáterli úı (800 páter), 2019 jyly - 25 úı (1 380 páter) paıdalanýǵa tapsyrylýy josparlanǵan. Jalpy, osy jyldyń 10 aıynda «Qazaqstannyń turǵyn úı qurylys jınaq banki» oblystyq fılıaly arqyly 5,7 mlrd. teńgeni quraıtyn 768 nesıe berilgen. «7-20-25» baǵdarlamasynyń sharttarymen ekinshi deńgeıli bankterge jalpy somasy 284,5 mln. teńgege 34 ótinish qoldaý tapqan» - deıdi oblys ákiminiń orynbasary Erkebulan Daýylbaev.
Sondaı-aq, «7-20-25» kredıtteý baǵdarlamasy aıasynda ákimdik pen Ulttyq bankiniń fılıaly, baǵdarlamaǵa qatysýshy bankter arasynda birlesken is-qımyl jospary bekitilgen. Oblysta bir páterge eń joǵarǵy zaem somasy orta eseppen 12,0 mıllıon teńge bolsa, bir aıǵa tólemaqysy 85 myń teńge, al eń tómengi 5 mln.teńge nesıege aılyq tólemaqy 35 myń teńgeni quraıdy. «Qazaqstannyń turǵyn úı qurylys jınaq banki» fılıalynda búgind 45 myńǵa jýyq salymshydan 10 mıllıardtan astam qarajat jınalǵan.
Aıta ketý kerek, kelesi jylǵa 465 myń sharshy metr turǵyn úı qurylysy josparlanyp otyr. Josparda bıýdjet esebinen 28 kóppáterli turǵyn úıdiń jáne 6 jańa alqaptyń ınjenerlik ınfraqurylymnyń qurylystary bar. Sonyń ishinde, 20 kóppáterli úıdi «7-20-25» baǵdarlama aıasynda turǵyndarǵa berý kózdelip otyr. Bıylǵy jylǵa 720 páterli 9 kredıttik turǵyn úı qurylysyn bastaýǵa baǵaly qaǵazdar esebinen qosymsha 725 mıllıon teńge bólindi.
Ǵıbrat Sembaı
