«7-20-25»: Jalǵan baǵdarlamalar kóbeıip barady

ASTANA. QazAqparat - Sońǵy kezde «7-20-25» baǵdarlamasyna uqsas atty jamylyp, jarnamasyn jasap jatqan túrli baǵdarlamalar kóbeıýde.  Bul týraly «Egemen Qazaqstan» gazetine «Baspana» ıpotekalyq uıymynyń syrtqy kommýnıkatsııalar qyzmetiniń ókilderi habarlap, halyqty abaı bolýǵa shaqyrǵan.

Jazýynsha, mundaı jarnamalardy taratyp otyrǵan qurylys kompanııalary men turǵyn úı kooperatıvteri ǵalamtor men áleýmettik jelilerde «0-20-25», «5-19-25», «5-10-25» syndy túrli aktsııalar uıymdastyryp jatyr. Alaıda olardyń baspanaly bolýdy armandaǵan halyqqa usynyp otyrǵan talaptary múlde basqasha.

«Mysaly, ataýy aıqaılap turǵanymen, nesıeni 25  jylǵa emes, 25 aıǵa ǵana berýi múmkin. Nemese «20» sany alǵashqy jarna emes, nesıe boıynsha ústeme mólsherleme bolýy ábden yqtımal. Mundaı sanda bar da, sanatta joq aktsııalardyń aty jer jaryp turǵanymen, erteń talaıdy sazǵa otyrǵyzyp ketýi bek múmkin. Oǵan negiz de joq emes. Óıtkeni buǵan deıin de turǵyndar men qurylys kompanııalary jáne turǵyn úı kooperatıvteri arasynda túsinbestik oryn alyp, sońynda atalǵan mekemeler jaýapkershilikten jaltaryp, qarapaıym halyq jıǵan-tergeninen qaǵylǵan oqıǵalar kezdesken-di» dep jazady «Egemen Qazaqstan».

Osyǵan baılanysty «Baspana» ıpotekalyq uıymy keıin keleńsizdikter týyndamaýy úshin halyqty mundaı aktsııalar men jarnamaǵa saqtyqpen qaraýǵa shaqyrady.  Birden aıtý kerek, atalǵan aktsııalarda kórsetilgen sharttar «7-20-25» baǵdarlamasynyń sharttarynan múlde bólek. Bul baǵdarlamada úı baǵasy men nesıe merzimine sáıkes, aı saıynǵy tólemderdiń kestesi ázirlengen. «Baspana» kompanııasynyń ókilderi kez kelgen jaǵdaıda artyq tólemderge urynbaý úshin kesteni paıdalanýǵa keńes beredi. Buǵan qosa, ıpotekalyq nesıeni tek qana baǵdarlamanyń ekinshi deńgeıli seriktes-bankteri bere alady. Qazirgi tańda tizimde «Tsentrkredıt», ATFBank, Tsesnabank, Bank RBK jáne Eýrazııalyq bank bar. Al qurylys kompanııasy nemese turǵyn úı kooperatıvteri esh ýaqytta «7 - 20 - 25» baǵdarlamasymen nesıe bere almaıdy.

«Búgingi tańda «7-20-25» baǵdarlamasynyń sharttary naryqtaǵy eń tıimdi usynys bolyp otyr. Tıisinshe, osy naryqtaǵy túrli kompanııalardyń «7-20 -25» baǵdarlamasynyń atyn jamylyp, óz ónimderin ótkizýge umtylatyndary da baıqalady. Biz naryqtyń damýyn qoldaımyz, alaıda halyqty aldaýǵa túbegeıli qarsymyz», - deıdi «Baspana» ıpotekalyq uıymynyń basshysy Qaırat Altynbekov.

Jalpy, búgingi tańda halyqtyń baspana alýǵa degen qulshynysy óte joǵary. Statıstıka komıtetiniń deregine súıensek, shilde aıynda turǵyn úılerdiń baǵasy 0,1 protsentke tómendese, jalǵa berý quny 0,5 protsentke qymbattaǵany anyqtalyp otyr.