«7-20-25»: SQO-da bastapqy jarnany sýbsıdııalaýǵa 200 mln teńge bólinedi
PETROPAVL. QazAqparat - Soltústik Qazaqstan oblysynda bıýdjettik sala jumysshylary úshin «7-20-25» baǵdarlamasy boıynsha baspana qunynyń bastapqy jarnasyn qarjylandyrýǵa 200 mln teńge bólinedi, dep habarlaıdy QazAqparat tilshisi.
Soltústik Qazaqstan oblysynyń ákimi Qumar Aqsaqalovtyń aıtýynsha, qarajattar jergilikti bıýdjetten bólinedi. Óńir basshysy bıýdjet salasynda eńbek etip kele jatqan jumysshylardy baspanamen qamtý mańyzdy mindetterdiń biri ekenin atap kórsetti. Olardyń barlyǵy da qajetti somany jınaı almaıdy. Soltústik Qazaqstan oblysyndaǵy ortasha jalaqy aıyna 107 myń teńgeni quraıdy, bul búkil respýblıkadaǵy eń tómengi kórsetkishterdiń biri.
«Biz jergilikti bıýdjet esebinen bastapqy jarnany ishinara sýbsıdııalaý úshin jyl sońyna deıin 200 mıllıon teńge bólemiz. Bastapqy jarna 20 paıyzdan 10%-ǵa deıin tómendetiledi, 200-300 adam qamtylady. Oqytýshylardy, dárigerlerdi, mádenıet qyzmetkerlerin baǵdarlamaǵa belsendi qatysýǵa shaqyramyn. Bul Memleket basshysynyń tapsyrmasy boıynsha qabyldanǵan teńdessiz sharalar», - dedi Q. Aqsaqalov.
Oblysta barlyǵy 2011 páteri bar 16 turǵyn úı salynyp jatyr. Bıyl 1500 páteri bar 10 turǵyn úı paıdalanýǵa berilmek. Keler jyly taǵy da 1500 páterli 12 turǵyn úı tapsyrylady. Sonyń 600-den astamy «7-20-25» baǵdarlamasyna sáıkes keletin bolady.
Osyǵan deıin Soltústik Qazaqstan oblysynda bıýdjet qyzmetkerlerine alǵashqy jarna tómendetiletindigi habarlanǵan bolatyn.
