«7-20-25»: Shymkentte turǵyn úı qunynyń lımıti 25 mln teńgege deıin ulǵaıtyldy
ShYMKENT. QazAqparat - Shymkentte «7-20-25» baǵdarlamasy boıynsha turǵyn úı qunynyń lımıti 25 mln teńgege deıin ulǵaıtyldy. Bul týraly «Baspana» Ipotekalyq uıymynyń basshysy Qaırat Altynbekov málimdedi, dep habarlaıdy Qazaqparat tilshisi.
Ulttyq Bank basqarmasy qabyldaǵan qaýlyǵa sáıkes, Shymkent qalasy úshin «7-20-25» baǵdarlamasy boıynsha satyp alynatyn turǵyn úıdiń eń joǵarǵy somasy 15 mln teńgeden 25 mln teńgege deıin ulǵaıtylǵan.
«Bul Shymkent turǵyndary úshin jaǵymdy jańalyq. Qalada turǵyn úı qurylysy belsendi túrde damyp keledi. Búginde Shymkentte 700 myń sharshy metr turǵyn úı salynýda. Lımıttiń ulǵaıýy qala turǵyndaryna turǵyn úı jaǵdaıyn jaqsartýǵa qosymsha múmkindik beredi», - dedi «Baspana» Ipotekalyq uıymynyń basshysy Qaırat Altynbekov.
Esterińizge sala keteıik, elimizdiń bes qalasynda atalǵan baǵdarlama aıasynda turǵyn úıdi satyp alýdyń eń joǵarǵy somasy 25 mln teńgeni quraıdy. Olardyń qatarynda Astana, Almaty, Aqtaý, Atyraý jáne Shymkent qalalary bar. Al, ózge óńirlerde turǵyn úıdi 15 mln teńgeden qymbat emes baǵaǵa satyp alýǵa bolady.
Aıta keteıik, aǵymdaǵy jyldyń 19 shildesinde Shymkent respýblıkalyq mańyzy bar qalanyń mártebesine ıe boldy. Tıisti Jarlyqqa Memleket basshysy qol qoıǵan bolatyn. Sondaı-aq QR Parlament májilisiniń bir top depýtattary kelip, «7-20-25» baǵdarlamasy boıynsha atqarylyp jatqan jumystarmen tanysyp ketken edi. Sol kezde qala basshylary men jergilikti qurylys kompanııalardyń basshylary atalǵan baǵdarlama aıasynda turǵyn úıdi satyp alýdyń eń joǵarǵy somasyn 25 mln teńgege kóterýdi suraǵan.
