7-20-25: Shymkentte baǵdarlamamen alǵashqy páterler berildi

ShYMKENT. QazAqparat - Shymkentte jańa jyl qarsańynda «Jas otaý» turǵyn úı kesheni paıdalanýǵa berildi. Turǵyndardyń qýanyshyn bólisýge kelgen qala  ákimi  Ǵabıdolla Ábdirahymov jeti qabatty 4 turǵyn úıdiń «7-20-25» baǵdarlamasy boıynsha  salynǵanyn atap ótti,  dep habarlaıdy QazAqparat tilshisi.

Qaladaǵy kópqabatty turǵyn úılerdi tapsyrý jumystary Elbasy Nursultan Nazarbaevtyń qazaqstandyqtardy baspanamen qamtamasyz etýge baǵyttalǵan jańa baǵdarlamasyn iske asyrý aıasynda júzege asyp otyr. Búgingi kúni 224 otbasy baspanaly bolsa, olardyń 15 januıa «7-20-25» baǵdarlamasymen páterlerge qol jetkizgen.

«Elbasynyń Joldaýynda kórsetilgen tapsyrmalarǵa sáıkes Shymkentte bıyl 9 791 páterli úıler salyndy. Jyl sońyna deıin qalamyzda 40 kópqabatty turǵyn úı paıdalanýǵa beriledi. Mundaı qýanyshty jańalyq bizdiń qalamyzdyń tarıhynda bolmaǵan. Jalpy, qala aýmaǵynda 184 úı salynýda. Bul biz úshin óte úlken kórsetkish»,- dedi ákim.

Qala basshysy sondaı-aq, «7-20-25» baǵdarlamasy boıynsha 130 adam ótinish bergenin atap ótti. Olardyń arasynda 90 ótinishti bankter maquldap úlgergen. Aldaǵy ýaqytta taǵy 100 otbasy jańa baǵdarlamamen baspanaly bolady dep kútilýde. Sonymen qatar, memlekettik bıýdjetten 68 úıdiń qurylysy júrip jatsa, onyń 13-i jyl sońyna deıin tapsyrylmaq.