«7-20-25»: Shildede ıpotekalyq kredıtterdi satyp alatyn arnaıy enshiles uıym qurylady
«Ótken Úkimet otyrysynda Ulttyq ekonomıka mınıstrligine memlekettik organdarmen jáne Ulttyq bankpen birlesip, Elbasynyń bes áleýmettik bastamasyn iske asyrý boıynsha Jol kartasyn daıyndaý tapsyrylǵan bolatyn. Bul Jol kartasynda naqty is-sharalar jáne olardyń oryndalý merzimderi men nátıjeleri qamtylýy tıis. Sol Jol kartasynyń jobasy daıyndaldy», - dep otyrysty ashqan Premer-Mınıstr Baqytjan Saǵyntaev jobany tanystyrý úshin alǵashqy sózdi Ulttyq ekonomıka mınıstri Tımýr Súleımenovke berdi.
Mınıstrdiń aıtýynsha, árbir otbasyna baspana alýdyń jańa múmkindikterin berý bastamasynyń oryndalýyna Ulttyq bank, al Úkimet tarapynan Investıtsııalar jáne damý mınıstrligi jaýapty bolady.
«Negizgi sharalar «7-20-25» baǵdarlamasyn bekitýge jáne ony iske asyrý úshin normatıvtik-quqyqtyq aktilerge ózgerister engizýge qatysty bolyp otyr. Shilde aıyna deıin ıpotekalyq kredıtterdi satyp alatyn arnaıy enshiles uıym qurylatyn bolady. Sonymen qatar «Nurly jer» baǵdarlamasy boıynsha ınfraqurylymdy jylyna 20 mlrd teńgege deıin qarjylandyrýǵa, ony ulǵaıtý jáne «7-20-25» baǵdarlamasynyń normalaryn eskere otyryp, oǵan túzetýlerdi engizý qarastyryp otyr», - dedi Tımýr Súleımenov.
