7-20-25: Nesıeni onlaın maquldaýǵa bolady

ALMATY. QazAqparat - Búgin Almatyda ótip jatqan Qarjygerler kongresinde «Baspana» Ipotekalyq uıymy» AQ basqarma tóraǵasy Qaırat Altynbekov «7-20-25» baǵdarlamasy boıynsha nesıeni onlaın maquldaý qashan engiziletinin habarlady, dep habarlaıdy QazAqparat tilshisi.

«Biz qazir osy joba boıynsha jumys jasap jatyrmyz. Jańa joba bolashaq klıentterge nesıeni onlaın maquldaýǵa múmkindik beredi. Bul ıpotekalyq kalkýlıator emes, nesıeni maquldaý. Ol úshin bankke kelip ýaqyt shyǵyndaýdyń qajeti joq. Birinshiden, barlyq aqparat Birinshi nesıe bıýrosynda bar. Ekinshiden, adamnyń tabysy jaıly aqparatty biz zeınetaqy tólemderi boıynsha memlekettik ortalyqtan, málimetterdiń memlekettik derekqorynan alamyz. Biz klıent týraly aqparatty tolyq biletin bolamyz. Árıne, tek onyń ruqsatymen ǵana», - dedi Qaırat Altynbekov.

Onyń aıtýynsha, barlyq aqparat avtomatty rejimde óńdelip, quzyrly organdar nesıeni maquldaý týraly sheshim shyǵara alady.

Odan ári elektrondy nesıe isi jasalady. Bul bankke qaǵaz qujattardy tasýdyń qajettiligin joıady.

«Qazir biz osy pılottyq jobany qolǵa alyp jatyrmyz. Keler jyldyń basynda bul júıe tolyq iske qosylatyn bolady. Jańa joba klıentterdiń nesıe alý jyldamdyǵyn jaqsartyp, banktiń shyǵyndaryn qysqartady. Nesıeni berý úshin oǵan aýdıt jasaýdyń qajettiligi bolmaıdy», - dedi Qaırat Altynbekov.

Aıta ketsek, QR Ulttyq banki tóraǵasy atalǵan baǵdarlamanyń operatory «Baspana» ıpotekalyq uıymy bolatynyn 5 mamyrda aıtqan edi. Ulttyq bank bekitken baǵdarlama boıynsha ıpotekalyq qaryzdar 7% jyldyq mólsherlememen 25 jylǵa beriledi. Kelesi sharttarynyń biri - alǵashqy salym 20% bolmaq. Jańa ıpotekalyq zaımdardy Qazaqstannyń kez kelgen azamaty ala alady. Ol úshin eń basty shart - adamnyń basynda jyljymaıtyn múlki bolmaýy kerek. Baǵdarlama boıynsha Qazaqstannyń kez kelgen óńirinen Almaty, Astana, Atyraý, Shymkent qalalarynan eń maksımaldy 25 mln teńgege, qalǵan óńirlerde 15 mln teńgege baspana satyp alýǵa bolady.

Elbasy Nursultan Nazarbaevtyń Qazaqstan halqyna Joldaýynda berilgen tapsyrmalarǵa sáıkes, «7-20-25» baǵdarlamasyna qatysýǵa nıet bildirgen azamattardyń alǵashqy jarnasyn arzandatý úshin jalpy sany 50 myń danadan kem emes turǵyn úı sertıfıkattary shyǵarylatyn bolady.

Qazirgi tańda Qazaqstan boıynsha quny 50 mlrd teńge bolatyn ótinimder qabyldady. Onyń ishinde 35 mlrd teńgeniń nesıeleri maquldandy.