7-20-25: Mańǵystaýda 131 otbasy baspanaly boldy

AQTAÝ. QazAqparat. Mańǵystaý oblysynda 7-20-25 baǵdarlamasymen 2 aıdyń ishinde 131 otbasy baspanaly bolǵan,- dep habarlaıdy Qazaqparat tilshisi.

Jańa baǵdarlama arqyly baspanaǵa qol jetkizgender atary artyp keledi. Máselen, joba aıasynda quny 1,6 mlrd teńge bolatyn 194 ótinish maquldanǵan.

Ótinish bergenniń basym bóligi jas otbasylar men bıýdjet salasynyń qyzmetkerleri. Nıettilerdiń usynysy ekinshi deńgeıli bankter arqyly oń sheshimin tapqan. 

Aqtaý Astana men Almaty qalasynan keıin baǵdarlama aıasynda úı alǵandar boıynsha 3-orynda tur. Sebebi, óńirde turǵyn úı qurylysy qarqyndy. 9 aıda 910 myń sharshy metr úı salynǵan. Onyń 312 páteri jalǵa berildi. Kelesi jyly jalǵa beriletin baspanalar sany budan da kóbeıedi.  

«Aǵymdaǵy jyldyń 9 aıynyń qorytyndysy boıynsha 910 myń sharshy metr turǵyn úı qoldanysqa berildi. Ósý qarqyny 137 % quraıdy. 2025 jylǵa deıin bir turǵyn 30 sharshy metr turǵyn úımen qamtylady», - deıdi oblystyq Memlekettik sáýlet-qurylys basqarmasynyń basshysy Eldar Mashyryqov.  

Turǵyn úı salýdan Mańǵystaý oblysy kósh bastap tur. Bıyl 812 páter berilgen. Kelesi jyly 950 myń sharshy metr turǵyn úı salý josparda.  

«288 páter salý josparlanǵan.  Jalpy aýdany 15,8 myń sharshy metr bolady. 19 shaǵyn aýdannan kóppáterli 2 úı, Quryq selosynan 4 úı salamyz. Fort-Shevchenkodan 48 páterli taǵy bir turǵyn úıdi belgilep otyrmyz», - deıdi Mańǵystaý oblystyq qurylys basqarmasy basshysynyń orynbasary Lepes Bekjanov.