«7-20-25»: Qostanaıda turǵyn úılerdiń baǵasy qansha

QOSTANAI. QazAqparat - Qostanaı oblysynda «7-20-25» baǵdarlamasy aıasynda 60 ótinim qabyldandy. Bul týraly búgin óńirlik kommýnıkatsııa qyzmetinde «Baspana» AQ seriktestermen jumys departamentiniń basqarma basshysy Baýyrjan Qýanyshev aıtyp berdi, dep habarlaıdy QazAqparat.

Qostanaı oblysynda turǵyn úı qurylysyna erekshe nazar aýdarylyp otyr. Jyl basynan beri 17 paıyzdyq ósimmen 227,6 myń sharshy metr turǵyn úı paıdalanýǵa berilgen. 60 ótinim qaraýǵa kelip tústi.

Qazirgi kezde  «7-20-25» baǵdarlamasy sheńberinde Qostanaıda 7 bank ótinishterdi qabyldaıdy. Olar: Tsentr Kredıt banki,  ATF banki,  Tsesnabank, RBK banki,  Eýrazııa banki,  Halyq banki jáne  ForteBank.

«Baǵdarlama sheńberinde satyp alynatyn turǵyn úıdiń quny tómendedi. Máselen, 2 bólmeli páter úshin 12 mıllıon teńge tóleısiz. Sonymen qatar, satylatyn turǵyn úıdiń eń joǵarǵy quny - 25 mıllıon teńge. Qostanaı oblysy boıynsha 500 mln teńge somasynda 60 ótinim qabyldanyp, 370 mln teńge somasynda maquldandy. Ótinim berýshilerdiń kóbi 25-35 jas shamasyndaǵy, turaqty resmı tabysy bar adamdar», - dedi «Baspana» BK AQ seriktestermen jumys departamentiniń basqarma bastyǵy  Baýyrjan Qýanyshev.

Elbasynyń tapsyrmasyna sáıkes, alǵashqy jarnany tómendetý boıynsha «Baspana» AQ ákimdiktermen birlesip jumystar júrgizýde. Jergilikti atqarýshy bılik dárigerler, muǵalimder, quqyq qorǵaý qyzmetkerlerine alǵashqy jarnanyń jartysyn tómendetetip, «7-20-25» turǵyn úı sertıfıkattaryn beretin bolady.

Jıynda aıtylǵandaı, «7-20-25» baǵdarlamasy aıasynda Qazaqstanda  55 mlrd teńge somasynda  4 657  ótinish qabyldandy.