«7-20-25»: Qostanaıda qansha úı tapsyrylady

QOSTANAI. QazAqparat - Bıyl Qostanaı oblysynda «7-20-25» baǵdarlamasy boıynsha 20 kredıttik úı paıdalanýǵa beriledi. Bul týraly oblys ákimdiginde ótken apparat májilisinde oblystyq Qurylys, sáýlet jáne qala qurylysy basqarmasynyń basshysy Nurlan Qatarbekov málim etti, dep habarlaıdy QazAqparat tilshisi.

Basqarma basshysynyń aıtýynsha, oblysta «7-20-25» baǵdarlamasy boıynsha 206 ótinim túsken. Bul maqsatta 1 mlrd 407 mln teńge jumsalý kózdelip otyr.

«Qazirge deıin oblysta 119 ótinim maquldandy. Qalǵandary ekinshi deńgeıli bankter arqyly qaralyp jatyr. Olar: «Bank Tsentrkredıt» AQ, «Qazaqstannyń Halyq banki» AQ, «ATF Bank» AQ, «Forte bank» AQ, «Tsesna bank» AQ. 2019 jyldyń qańtar aıynan bastap «Sberbank» AQ da memlekettik baǵdarlamany oryndaýǵa nıet bildirdi. Byltyr qarasha aıynda ekinshi deńgeıli bankterge 352 bıýdjettik páterler tapsyryldy. Onyń 118-i «Baıterek Development» uıymyna tıesili», - dedi Nurlan Qatarbekov.

Osy jyly «Áýejaı» shaǵyn aýdanynda 32,9 myń sharshy metr aýmaqta baspana salynady. Qala ishindegi «ıÝbıleınyı» shaǵyn aýdanynda 67 gektar jerde qurylys jumystary bastaldy. Munda 1233 páterlik 11 úı qoldanysqa beriledi. Úılerdi «BK-Stroı» JShS salady.

Turǵyn úı qurylysy Qostanaı aýdanynda da qyzý júrip jatyr. Munda «7-20-25» baǵdarlamasynyń 9 qatysýshysyna «Tobyl» kásipkerlerdi qoldaý qory 15 jylǵa paıyzsyz nesıe berip otyr. Úıler «Severnyı» shaǵyn aýdanynda turǵyzylǵan.

Óńirde 2019 jyly 20 kredıttik úı paıdalanýǵa beriledi. 2018 jyly tolyq iske asyrylmaǵan turǵyn úı qurylysyn eskere otyryp, ekinshi deńgeıli bankterge «7-20-25» baǵdarlamasy aıasynda 500-ge jýyq páter usynylmaq.

Al oblys ákimi Arhımed Muhambetov jas otbasylar men bıýdjettik sala qyzmetkerlerine jasaltyn jeńildikti esten shyǵarmaýdy tapsyrdy.

«Jalǵa beriletin turǵyn úılerdiń qurylysyn sapaly iske asyryńyzdar. Eń aldymen, dárigerlerge, muǵalimderge, ishki ister organdary qyzmetkerleri men áleýmettik salalardaǵy jas mamandarǵa jergilikti bıýdjet esebinen sýbsıdııalaý jalǵasady. Memlekettik baǵdarlama arqyly baspana alatyndarmen tyǵyz baılanys jasańyzdar. Qajet bolsa, demalys kúni jeke qabyldaý júrgizý qajet. Biz qanshama turǵyn úı saldyq, biraq onyń ıgerilýi tómen. Bul jumysqa degen jaýapkershiliktiń azdyǵy. Osy jyly ekinshi deńgeıli banktermen birigip, 500 páter tapsyramyz. Az kórsetkish emes. Sondyqtan, halyqqa nasıhattaý jumystaryn toqtatpańyzdar. Kerek deseńizder, qosymsha qarjy bólýge daıynbyz», - dedi Arhımed Muhambetov.

Buǵan deıin habarlaǵanymyzdaı, Elbasynyń Joldaýyn júzege asyrý aıasynda pedagogtar, dárigerler jáne polıtseılerge «7-20-25» baǵdarlamasy boıynsha bastapqy jarna tómendetildi.