«7-20-25»: Qostanaıda dárigerlerge ǵana alǵashqy jarna sýbsıdııalanady

QOSTANAI. QazAqparat - Qostanaıda «7-20-25» baǵdarlamasy aıasynda bıýdjettik sala qyzmetkerleriniń ishinen dárigerlerge ǵana alǵashqy jarna sýbsıdııalanady. Bul týraly apparat májilisinde oblys ákimi Arhımed Muhambetov málim etti, dep habarlaıdy «QazAqparat» HAA tilshisi.

Qostanaı oblysynyń ákimdigi dárigerlerdi qoldap, turǵyn úı alý úshin sýbsıdııa berýge sheshim qabyldady.

«Oblysta dárigerler jetispeıtinin jaqsy bilesizder. Sondyqtan 7-20-25» baǵdarlamasy aıasynda tek dárigerlerge alǵashqy jarna sýbsıdııalanatyn bolady. Onyń kólemi shamamen 10 paıyz bolýy múmkin. «Tobyl» áleýmettik qoldaý korporatsııasy arqyly sýbsıdııalaımyz. Biraq, bul qaıtarylatyn soma ekenin eske salamyn. 10 jylǵa az paıyzben beriledi», - dedi Arhımed Muhambetov.

Elbasy bıylǵy Joldaýynda aımaq basshylaryna qoljetimdi jalǵa beriletin turǵyn úılerdiń qurylysyn júrgizip, eń aldymen dárigerlerdiń, muǵalimderdiń, áleýmettik jáne ózge salanyń bilikti mamandaryna jergilikti bıýdjet esebinen jeńildetilgen ıpoteka boıynsha alǵashqy jarnasyn ishinara sýbsıdııalaý máselesin shegine jetkizýdi júktedi. 

Al oblystyq qurylys, sáýlet jáne qala qurylysy basqarmasynyń basshysy Nurlan Qatarbekov aıtqandaı, «7-20-25» baǵdarlamasy aıasynda 56 ótinim túsken. Bul 470 mln teńgeni quraıdy.