«7-20-25»: Qostanaıda 30 otbasy baspanaly boldy
QOSTANAI. QazAqparat - Qostanaı oblysynda «7-20-25» baǵdarlamasy boıynsha turǵyndardan nebári 42 ótinim túsken, dep habarlaıdy QazAqparat.
Qostanaıdaǵy Ulttyq bank fılıaly dırektorynyń orynbasary Janna Omarhanovanyń sózinshe, Qostanaı oblysy «7-20-25» baǵdarlamasyn júzege asyrý jóninen respýblıka boıynsha kósh sońynda keledi. Oǵan birneshe faktor áser etýde.
«Birinshiden, baǵdarlamanyń bastalǵanyna úsh-aq aı ótti. Ekinshiden, bizde Almaty, Astana, Shymkent sııaqty úlken qalalardaǵydaı aýqymdy qurylys júrip jatqan joq. Buǵan qosa turǵyndarǵa jańa baǵdarlama týraly tolyq aqparat áli de jetpeı otyr. Bul baǵdarlamanyń birden qarqyn alyp ketýine kedergi etedi. Munyń syrtynda, «7-20-25» baǵdarlamasymen qatar júzege asyrylyp jatqan ózge de memlekettik baǵdarlamalar bar» - dedi Ulttyq bank fılıaly dırektorynyń orynbasary Janna Omarhanova.
Jalpy, óńirde «7-20-25» memlekettik turǵyn úı baǵdarlamasy boıynsha 3 aı ishinde 42 ótinish qabyldanyp, onyń 35-i maquldandy. Búginge deıin 29 otbasy baspanaly boldy.
«Baǵdarlamany júzege asyrýǵa 10 shaqty jergilikti turǵyn úı kompanııasy tartyldy. Atalǵan baǵdarlama boıynsha «BK-STROI» qurylys kompanııasy turǵyndarǵa 34 páter usynyp otyr», - deıdi Janna Omarhanova.
Qostanaı qalasynyń irgesindegi Qonaı aýylynda jańa turǵyn úıler salynyp jatyr. Keleshekte sol aýylda boı kóteretin turǵyn úılerdiń birazy «7-20-25» baǵdarlamasy boıynsha turǵyndarǵa beriledi. Munda bir qabatty jeke úılermen qatar 50 shaqty kóp qabatty turǵyn úıler salý josparlanǵan.
Aıta keteıik, búgin Aqordada Qazaqstan halqyna kezekti Joldaýyn jarııalaǵan Elbasy Nursultan Nazarbaev memleket eshkimge de tegin baspana bermeıtinin aıtty.
«Halyqtyń áleýmettik turǵydan álsiz toptary úshin iri qalalarda jaldamaly turǵyn úı qurylysyn ulǵaıtý qajet. Barlyqtaryńyzdyń aldynda, búkil elge taǵy da aıtamyn: qazir bizde basqa álem, naryqtyq ekonomıka, memleket eshkimge de tegin baspana bermeıdi», - dedi Elbasy
