7-20-25: Qostanaı oblysynda 640 ótinim qabyldandy

QOSTANAI. QazAqparat – Qostanaıda «7-20-25» turǵyn úı baǵdarlamasyna ótinim berýshiler sany edáýir ósken, dep habarlaıdy QazAqparat QR Ulttyq banki Qostanaı fılıalynyń dırektory Jomart Qajrahımovqa silteme jasap.

Óńirde «7-20-25» memlekettik turǵyn úı baǵdarlamasy belsendi iske asyrylýda. Qostanaı oblysy maquldanǵan kredıtter sany boıynsha Nur-Sultan jáne Almaty qalalarynan keıin alǵashqy úshtikke kiredi.

«Osy jyldyń 25 shildedegi jaǵdaı boıynsha 4,7 mlrd teńgege 638 ótinim qabyldanyp, 3,2 mlrd teńgege 437 ótinim maquldandy. Baǵdarlamaǵa engizilgen sońǵy ózgeristerdiń biri – bastapqy jarna somasyn 20%-dan artyq tóleý múmkindigi, bul qaryz alýshylardyń tólem qabilettiligin baǵalaýǵa oń áser etedi. Sonyń nátıjesinde turǵyn úıge ótinim berýshiler kún sanap kóbeıip keledi», - dedi Jomart Qajrahımov jýrnalıstermen ótken brıfıng barysynda.

Sonymen qatar oblysta ıpotekalyq turǵyn úı qaryzdaryn qaıta qarjylandyrý baǵdarlamasy iske asyryla bastady. Baǵdarlama talaptaryna sáıkes, barlyq valıýtalyq ıpotekalyq qaryzdy qaıta qarjylandyrý merzimi 2019 jylǵy 31 jeltoqsanǵa deıin ulǵaıdy.

«Al «Astana Banki» Q jáne «Qazaq Banki» AQ arqyly nesıeni qaıta qarjylandyrý merzimi 2020 jylǵy 31 jeltoqsanǵa deıin uzartyldy. Qaryz alýshylar 15 jeltoqsanǵa deıin qaıta qarjylandyrý týraly ótinishpen kredıtor-bankke júginýleri qajet. Qazaqstan azamattarynyń boryshtyq júktemesin tómendetý boıynsha sharalar da qabyldanady», - dep túsindirdi bank tóraǵasy.

Jomart Qajrahımov tutynýshylyq kredıt berý naryǵynyń baıaýlaǵanyn aıtty. Búginde oblys turǵyndarynyń bereshegi 89 mlrd teńgege deıin ósken. Birinshi jartyjyldyqta bankter 50 mlrd teńge berdi. Negizinen, halyqtyń jan basyna shaqqandaǵy tutynýshylyq nesıeleri boıynsha Qostanaı óńiri respýblıkada 13-shi orynda.