«7-20-25»: qazaqstandyqtarǵa alaıaq deldaldardan saq bolý eskertildi

Qazaqstannyń ornyqtylyq qory azamattardy «7-20-25» turǵyn úı ıpotekalyq baǵdarlamasynyń aınalasynda áreket etetin túrli deldaldar men kúmándi tulǵalarǵa saqtyqpen qaraýǵa shaqyrady.

— Qazirgi tańda baǵdarlamaǵa qatysýshy bankterdiń basym bóligi ótinimderdi qabyldaýdyń tolyq onlaın formatyna kóshti. Bul ashyqtyqty qamtamasyz etip, barshaǵa birdeı teń qoljetimdilik berdi jáne ótinimderdi qaraý protsesine aralasý múmkindigin joıdy. Onlaın-kezek avtomatty túrde qalyptasady, al bank qyzmetkerleri nemese úshinshi tulǵalar tarapynan qandaı da bir manıpýlıatsııalar tehnıkalyq turǵydan múmkin emes, — delingen qor habarlamasynda.

Qazaqstannyń ornyqtylyq qory ózin ıpotekalyq broker, keńesshi nemese deldal retinde tanystyratyn «kómekshiler» tarapynan alaıaqtyq jaǵdaılarynyń jıilep ketkenin habarlaıdy.

— «7-20-25» baǵdarlamasynyń tanymaldylyǵyn paıdalana otyryp, olar syıaqyǵa kezekti «jedeldetýdi», oryn «brondaýdy», nesıeni «maquldatýǵa kepildik berýdi» nemese bankterdiń lımıtterin «alyp berýdi» usynady. Alaıda, bul jalǵan qyzmet. Sebebi Baǵdarlama aıasynda bankterdiń ótinim qabyldaý protsesi tolyq avtomattandyrylǵan jáne oǵan syrttan áser etý múmkin emes. Bankter de óz quzyreti sheńberinde mundaı quqyqbuzýshylyqtarmen kúres júrgizýde. Eshkimge aqsha tólemeı, ózińiz ıpotekaǵa ótinim bere alasyz. Bul tez, tegin jáne deldaldarsyz júzege asady. Kúmándi deldaldarmen baılanysqa túspeýdi jáne olarǵa aqsha bermeýdi ótinemiz, — delingen habarlamada.

Qurylys kompanııalarynyń satý bólimindegi jaǵdaılarǵa da erekshe nazar aýdarý kerek ekenin eskertti.

— Eger satý menedjerleri syıaqy surap, páter tańdaýǵa nemese ıpoteka rásimdeýge kómek usynsa, kóp jaǵdaıda kompanııa basshylyǵy óz qyzmetkerleriniń mundaı alaıaqtyq áreketterinen habarsyz bolyp keledi. Mundaı jaǵdaılarda tikeleı qurylys kompanııasynyń basshylyǵyna shaǵymdanýǵa bolady.

Eger sizge Qazaqstannyń ornyqtylyq qory atynan messendjerlerde, sonyń ishinde WhatsApp arqyly habarlama kelse, ondaǵy siltemelerge ótpeńiz. Habarlamany joıyp, jiberýshini buǵattaý usynylady. Alaıaqtar zııandy siltemeler nemese faıldar jiberýi múmkin, bul qurylǵynyń buzylýyna jáne jeke derekterdiń taralýyna ákelýi yqtımal. Qor qyzmetkerleri jeke tulǵalarmen messendjerler arqyly baılanyspaıdy.

Qor banktermen alaıaqtyq pen sybaılas jemqorlyq táýekelderiniń aldyn alý máseleleri boıynsha turaqty túrde ózara is-qımyl júrgizedi. Eger siz osyndaı faktilerge tap bolsańyz, dereý quqyq qorǵaý organdaryna júginýińizdi suraımyz. Barlyq suraq boıynsha Qazaqstannyń ornyqtylyq qoryna habarlasa alasyzdar: +7 (727-27) 7-20-25, — delingen habarlamada.

Aıta ketelik ıslamdyq ıpoteka bıyl iske qosylýy múmkin.