«7-20-25»: Qaraǵandyda páterlerdiń jármeńkesi ótedi

QARAǴANDY. QazAqparat - Qaraǵandy qalasynda 29 qyrkúıekte «7-20-25» jármeńkesi ótpek. Bul týraly QazAqparat «Baspana» ıpotekalyq uıymynyń baspasóz qyzmetine silteme jasap habarlaıdy.

«Biz halyqtyń «7-20-25» baǵdarlamasy boıynsha satylatyn páterler týraly aqparatqa sýsap otyrǵandyǵyn talmaı aıtyp kelemiz. Uıymdastyrylyp jatqan jármeńkeler azamattarǵa osyndaı kerek aqparatty berýde taptyrmas quralǵa aınaldy. Óz kezeginde qurylys kompanııalary da tutynýshylarynyń barlyq qajettiligin anyqtap, aýdıtorııamen etene jumys isteýge múmkindik alyp otyr», - dedi atalǵan uıymynyń basshysy Qaırat Altynbekov.

Kórmege 1200-den astam Qaraǵandy páterleri shyǵarylmaq. Sonymen birge, kelýshilerge qurylys kompanııalary, bankter men «Baspana» Ipotekalyq uıymynyń ókilderi keńes beretin bolady. Qaraǵandy qalasyndaǵy Serik Sapıev atyndaǵy Boks saraıynda ótetin sharaǵa kirý tegin.