«7-20-25»: Bıyl Qostanaıda kóppáterli 11 turǵyn úı salynady
QOSTANAI. QazAqparat - Óńirde Elbasynyń áleýmettik bastamalary qarqyndy júzege asýda. Búgin «Nur Otan» partııasynyń janynan qurylǵan qoǵamdyq keńes músheleri aımaqtaǵy áleýmettik nysandardy aralady, dep habarlaıdy QazAqparat.
Oblysta «7-20-25» memlekettik baǵdarlamasy arqyly úı alý tetikteri jeńildetilgen.
«Jyl basynda partııanyń Bes áleýmettik bastamany túsindirý men iske asý barysyn tekserý boıynsha is-sharalar tizbegi qurastyrylǵan edi. Ótken jyldyń ózinde 6 otyrys ótkizilip, nátıjesinde 13 usynys ázirlendi. Bes áleýmettik bastamany aqparattyq-túsindirý sharalary aıasynda 900-den astam kezdesý uıymdastyryldy. Osy jyly Qoǵamdyq keńes músheleri ekinshi deńgeıli bank ókilderimen birlesip arnaıy aktsııa uıymdastyrdy. Qoǵamdyq qabyldaýda «7-20-25» baǵdarlamasy túsindirildi. Birneshe saǵatta 100-den astam qostanaılyq keńes aldy», - dep málimet berdi «Nur Otan» partııasy QOF fılıaly tóraǵasynyń birinshi orynbasary Jańabaı Bısımbaev.
Jalpy, Qostanaı óńirinde 600-den astam kóp balaly otbasy baspana kezeginde tur. Olardyń 70%-i oblys ortalyǵy men Rýdnyı qalasynda jáne Qostanaı aýdanynda tirkelgen. Jýyrda olardy baspanamen qamtamasyz etýge respýblıkalyq jáne oblystyq bıýdjetten 900 mln teńge bólindi. Bul qarjynyń bir bóligine atalǵan otbasylar úshin daıyn páterler satylyp alynsa, ekinshi bóligi baspana kezeginde turǵan kóp balaly jáne turmysy tómen otbasylarǵa«Turǵyn úı jınaq banki» arqyly 2% jeńildikpen beriledi.
Oblystyq turǵyn úı qurylysy basqarmasynyń aqparatyna sáıkes, «Baqytty otbasy» aıasynda jańa baǵdarlama mamyr aıynan bastalady. Qarjynyń qalǵan bóligine kóp balaly otbasylaryna arnalǵan jaldamaly úıler turǵyzylmaq. Mundaı úıdiń biri byltyr Amankeldi aýdanynda boı kótergen edi. Bıyl Fedorov aýdanynda 24 páterlik, al Lısakov qalasynda 60 páterlik jaldamaly úı salynbaq.
Óńir turǵyndarynyń «7-20-25» ıpotekalyq baǵdaramasy boıynsha baspana alý kórsetkishi de birshama ósken. Búginge deıin turǵyndar tarapynan ekinshi deńgeıli bankterge kólemi 2 mlrd. teńgege jýyq 400 den astam ótinim túsip, onyń 306-i qanaǵattandyrylǵan. Tobyl óńiri bul baǵdarlamany iske asyrýda elimiz boıynsha aldynǵy qatarda keledi.
«Byltyr bul baǵdarlama boıynsha turǵyndarǵa jalǵyz «Tsentrkredıt Bank» qana nesıe berip kelse, bıyl oǵan «Halyq banki», «Forte», «ATF», «Tsesna bank», «Eýrazııa» jáne «Sberbank» sııaqty qarjy mekemeleri qosylyp otyr»,- deıdi QR Ulttyq banki QOF qarjy mekemelerin qadaǵalaý jáne qarjylaı qyzmet kórsetý boıynsha tutynýshylar quqyǵyn qorǵaý bóliminiń basshysy Áset Qýanyshbaev
Jalpy «7-20-25» baǵdarlamasy boıynsha bıyl 11 turǵyn úı salynady. Onda 1233 páter bar. Munyń syrtynda atalǵan baǵdarlamanyń tıimdiligin arttyrý maqsatynda ekinshi jartyjyldyqta oblıgatsııalyq qaryzdar boıynsha salynyp jatqan nesıelik turǵyn úılerdiń esebinen 368 páterdi ekinshi deńgeıli bankterge ótkizý josparlanǵan.
