«7-20-25» baǵdarlamasynyń ornyna usynylǵan ıpotekanyń paıyzdyq mólsherlemesi ózgeredi
Bul týraly QR Indýstrııa jáne ınfraqurylymdyq damý vıtse-mınıstri Erkebulan Daýylbaevtyń QazAqparat saýalyna joldaǵan jaýabynda aıtylǵan.
«QR Ulttyq bankiniń bazalyq mólsherlemeni ulǵaıtýy ıpotekalyq kredıtteýge keri áserin tıgizetinin eskere otyryp jáne «Ashyq NQA» portalyndaǵy talqylaýlardan soń, mınıstrlik qazirgi ýaqytta ıpotekalyq turǵyn úı qaryzdary boıynsha syıaqy mólsherlemesiniń jyldyq 8%-na deıin sýbsıdııalaýdy usynady. Bul rette sýbsıdııalaýdyń syıaqy mólsherlemesi 20%-dan aspaıtyn jáne Ulttyq banktiń bazalyq mólsherlemesinen 5%-dan aspaıtyn EDB-niń (ekinshi deńgeıli bank) ıpotekalyq baǵdarlamalaryna qoldanylatyn bolady», - dep jazylǵan mınıstr orynbasarynyń jaýabynda.
ıAǵnı, atalǵan ıpoteka osy nusqa boıynsha qoldanysqa engen jaǵdaıda nesıe alýshy tóleıtin paıyzdyq mólsherlemeniń kólemi ekinshi deńgeıli bankten qandaı ıpotekalyq ónim rásimdelgenine baılanysty bolmaq. Mysaly, bank usynǵan ıpotekanyń paıyzdyq mólsherlemesi 17 paıyz bolsa, onyń 8 paıyzyn 10 jyl kóleminde memleket ótep otyrady. Al nesıe alýshy ıpotekasyn 10 jyl boıynda 9 paıyzben ótep otyrady.
Mınıstrlik atalǵan sýbsıdııadaý baǵdarlamasyna syıaqy mólsherlemesi 20%-dan aspaıtyn jáne Ulttyq banktiń bazalyq mólsherlemesinen 5%-dan aspaıtyn ıpotekalar arqyly ǵana qatysýǵa bolatynyn eskertip otyr.
Sondaı-aq, mınıstrlik atalǵan baǵdarlama boıynsha paıyz sýbsıdııasy 10 jylǵa ǵana tólenetinin aıtyp otyr.
Eske sala keteıik, mınıstrlik jańa ıpotekalyq baǵdarlamanyń sharttaryn «Ashyq NQA» portalynda jarııalap, kópshilik talqysyna usynǵan bolatyn.
Vıtse-mınıstrdiń málimeti boıynsha, buıryq jobasy búginde Ulttyq ekonomıka jáne Qarjy mınıstrlikteriniń kelisimin almaǵan.
«Aldaǵy ýaqytta joǵaryda atap ótken mınıstrlikter kelisimin bergen jaǵdaıda, buıryq jobasy Ádilet mınıstrliginen tirkeýden ótip, Qazaqstan Respýblıkasy Qarjy mınıstrliginiń qarjylandyrýynan soń ótinishter azamattardan qabyldanatyn bolady», - deıdi mınıstrdiń orynbasary.
