«7-20-25» baǵdarlamasynyń operatory eń jıi qoıylatyn suraqtarǵa jaýap berdi
Mamandardyń aıtýynsha, qazir Qazaqstannyń barlyq aımaqtarynan quny 57 mlrd teńge bolatyn 4831 ótinish tústi. Bankter 37,7 mlrd teńgeniń 3144 ótinishin maquldady.
Óńirlerdiń ishinde Astana men Almaty kósh bastap keledi. Odan keıin Mańǵystaý, Aqtóbe, Shyǵys Qazaqstan, Aqmola oblystarynda belsendilik bar.
Almatyda maquldanǵan nesıe somasy 10 mlrd teńgeden asady. 826 otbasynyń ótinishin bank maquldady.
«Eger baǵdarlama klıentiniń sıpatyna kelsek, ol - 25-35 jas aralyǵyndaǵy turaqty tabysy bar, ekonomıkalyq belsendi azamattar. Baǵdarlama boıynsha orta eseppen 11,7 mln teńge turatyn baspanaǵa suranys óte kóp. Al, 15-25 mln teńge arasynda baspana alatyn klıentterdiń sany 7 paıyzdan aspaıdy», - dedi Talǵat Baıdosov.
«7-20-25» baǵdarlamasy jańadan salynǵan úılerdi satyp alýǵa ǵana nesıe beredi. Mamandar naryqta birinshi kezektegi, ıaǵnı jańadan salynǵan úılerge tapshylyq bar ekenin aıtty.
«Ásirese aımaqtarda bul problema baǵdarlamanyń júrýine kedergi keltirip otyr. Oǵan eki nárse sebep: birinshisi - qurylys kompanııalarynyń 90 paıyzy baspanany paıdalanýǵa bermeı turyp satyp jiberedi. Jekemenshik kompanııalar baspanany Almaty men Astanada salǵandy qup kóredi. Óńirlerge kópshiligi barmaıdy. Basqa óńirlerde qurylys jumystary ákimdik tarapynan bólingen qarjyǵa júrgiziledi. Osyǵan baılanysty óńirlerde jańadan salynǵan baspana qataryn kóbeıtý maqsatynda baǵdarlamaǵa ózgerister engizildi. «Baspana» uıymy jergilikti atqarý organdaryna «7-20-25» baǵdarlamasy aıasynda úı salý úshin 150 mlrd teńge aýdarmaq. Qazir bul ózgeristiń tetikteri ákimdikpen jan-jaqty kelisilip jatyr», - dedi T.Baıdosov.
«Baspana» ókili ákimdikterdiń «Nurly jer» boıynsha jumys atqaryp kelgenin, sondyqtan bul baǵdarlama boıynsha qıyndyqtar týyndamaıtynyn aıtty.
«Baǵdarlamaǵa qoldanystaǵy úılerdi kirgizý týraly suranys óte kóp. Alaıda, bul joba 2 mańyzdy mindetti kókseıdi. Eń aldymen adamdardy baspanamen qamtý, qurylys salasynyń jandanýy. Osyǵan baılanysty «Baspana hıt» jobasy ashyldy. Bul boıynsha da alǵashqy salym - úıdiń qunynyń 20%. Sosyn klıentke 11 paıyzben nesıe beriledi. Nesıe 15 jylǵa beriledi», - dedi ol.
Munyń aldynda QR Ulttyq bankiniń Almaty bólimshesi basshysynyń orynbasary Gúlnar Shemetova 7-20-25 baǵdarlamasy boıynsha qarajat qalaı tartylatynyn aıtqan bolatyn.
