«7-20-25» baǵdarlamasyn júzege asyrýda alypsatarlyqqa jol berilmeıdi -Ulttyq bank

ASTANA. QazAqparat - «7-20-25» turǵyn úı qurylysy baǵdarlamasyn júzege asyrý barysynda alypsatarlyqqa jol bermeımiz. Bul týraly QR Ulttyq banki tóraǵasynyń orynbasary Oleg Smolıakov málim etti, dep habarlaıdy QazAqparat tilshisi.

Onyń aıtýynsha, baǵdarlamada baspananyń shekti baǵasy kórsetilgen. Atap aıtqanda, Astana, Almaty, Aqtaý, Atyraý qalalarynda bul kórsetkish - 25 mln teńgeden, al óńirlerde - 15 mln teńgeden aspaýy tıis.

«Bul somalardy anyqtaý úshin jergilikti atqarý organdarymen belsendi jumys istedik. Bizdiń oıymyzsha, bul baǵalar qazirgi naryqtyq jaǵdaılar men baspana naryǵyna sáıkes keledi», - dep atap ótti O. Smolıakov Senatta «Nurly jer» turǵyn úı qurylysy baǵdarlamasyn júzege asyrý barysyna arnalǵan ótken dóńgelek ústelde.

Aıta keteıik, Oleg Smolıakov mamyr aıynyń sońyna deıin QR Ulttyq banki «7-20-25» baǵdarlamasynyń negizgi baǵyttaryn bekitetinin málimdedi.

Onyń aıtýynsha, bul baǵdarlama memlekettik qyzmetkerlerge de, kásipkerlerge de arnalǵan.