«7-20-25» baǵdarlamasymen 200-ge jýyq qazaqstandyq baspanaly boldy
«2018 jyldyń 3 tamyzyndaǵy jaǵdaıǵa sáıkes, «7-20-25» baǵdarlamasynyń seriktes bankterine jalpy somasy 11 991 465 581 teńgeniń 1039 ótinimi tústi. Onyń ishinde 640 ótinimge 7 311 155 602 teńge maquldandy. Bul baǵdarlama boıynsha 3 tamyzda 193 qazaqstandyq baspanaly boldy. Qazirgi ýaqytta berilgen kredıttiń jalpy somasy 2 206 363 499 teńgeni quraıdy», - delingen jaýapta.
Keltirilgen derekterge qaraǵanda, Almatynyń 82, Astananyń 27, Aqtaýdyń 25, Qostanaı oblysynyń 16 jáne Shyǵys Qazaqstan oblysynyń 11 turǵyny baspanaly bolǵan. Bir adamǵa berilgen kredıttiń ortasha somasy 11,4 mln teńgeni quraıdy.
«Baspana» uıymy «7-20-25» baǵdarlamasy qaı ýaqytta keńeıtilip, oǵan ekinshi naryqtan da páter satyp alý múmkinshiligi qashan qosylatyndyǵy týraly suraqqa da jaýap berdi.
«Baǵdarlamanyń bekitilgen talaptaryna sáıkes, daıyn turǵyn úıdi ǵana satyp alýǵa bolady. Ekinshi naryqtaǵy turǵyn úılerin de satyp alý múmkinshiligi qosylyp, baǵdarlama keńeıtilgen jaǵdaıda Qazaqstan Respýblıkasynyń Ulttyq banki men «Baspana» ıpotekalyq uıymy bul jaıynda buqaralyq aqparat quraldary arqyly resmı habarlaıtyn bolady», - dep atap ótedi ıpotekalyq uıym.
Esterińizge sala keteıik, «7-20-25» baǵdarlamasy aǵymdaǵy jyldyń 5 naýryzynda Memleket basshysy Nursultan Nazarbaev jarııa etken Bes áleýmettik bastamany júzege asyrý aıasynda ázirlengen. Mamyr aıynyń sońynda Ulttyq bank bekitken baǵdarlama kelesi sharttar arqyly ıpotekalyq zaım berýdi kózdeıdi: syıaqy stavkasy - 7 paıyz, bastapqy jarna - 20 paıyz, zaım merzimi - 25 jylǵa deıin.
