«7-20-25» baǵdarlamasy arqyly páterdi qalaı satyp alýǵa bolady
Atalǵan uıymnyń QazAqparattyń resmı saýalyna bergen jaýabyna sáıkes, jeke tulǵalar baǵdarlama arqyly zaım alý úshin kelesi talaptarǵa saı bolýy tıis: Qazaqstan Respýblıkasynyń azamattyǵynyń bolýy mindetti, qaryz alýshyda úı satyp alýǵa, onyń qurylysyna nemese jóndeýge alǵan zaemdary boıynsha ótelmegen qaryzynyń bolmaýy qajet, qaryz alýshyda kásipkerlik nemese eńbek qyzmetinen túsetin tabysynyń bolýy qajet, qaryz alýshyda Qazaqstan Respýblıkasynyń aýmaǵynda otbasynyń ár múshesine shaqqanda 15 sharshy metrden aspaıtyn jataqhana bólmelerinen, apatty jaǵdaıdaǵy úılerden basqa baspananyń bolmaýy tıis.
Buǵan qosa, bankter zaemshige baǵdarlama sharttaryna qaıshy kelmeıtin qosymsha talaptar qoıa alady. Baǵdarlama boıynsha zaım alý úshin qatysýshy bankterge júginý qajet. Ol úshin baǵdarlamaǵa qatysý úshin qajetti barlyq qujattardy jınaý kerek.
Eń aldymen zaemshi baspana taýyp, odan keıin baspanany salýshyǵa júginedi. Óz kezeginde baspana salýshy zaemshige turǵyn úıge arnalǵan barlyq qujattardy bankke usyný úshin beredi. Odan keıin zaemshi satyp alatyn páterine táýelsiz baǵalaý jasatady. Baǵalaý aktisin alǵannan keıin bankke júginedi.
Bank zaemshiden qajetti qujattardy suraıdy jáne zaım berý týraly sheshim shyǵarady. Bank oń sheshim shyǵarǵan jaǵdaıda baspana salýshyǵa qajetti somany aýdarady. Zaemshi baspana salýshymen satyp alý-satý kelisimshartyna qol qoıyp, satyp alǵan páterin banktiń kepildik múlki retinde rásimdeıdi.
Esterińizge sala keteıik, «7-20-25» baǵdarlamasy aǵymdaǵy jyldyń 5 naýryzynda Memleket basshysy Nursultan Nazarbaev jarııa etken Bes áleýmettik bastamany júzege asyrý aıasynda ázirlengen. Mamyr aıynyń sońynda Ulttyq bank bekitken baǵdarlama kelesi sharttar arqyly ıpotekalyq zaım berýdi kózdeıdi: syıaqy stavkasy - 7 paıyz, bastapqy jarna - 20 paıyz, zaım merzimi - 25 jylǵa deıin.
