«7-20-25» baǵdarlamasy arqasynda baspanaǵa qol jetkizdik - jas otbasy
ORAL. QazAqparat - «7-20-25» baǵdarlamasy arqasynda qolaıly baspanaǵa qol jetkizdik. Bul týraly Oral qalasynda turatyn jas otbasy Talǵat Nııazǵalıev pen Aınur Tasmuhanova málim etti, dep habarlaıdy QazAqparat tilshisi.
Olardyń aıtýynsha, buǵan deıin jas otbasy ata-anasymen birge turyp kelgen eken.
Talǵat «Qazaqtelekom» AQ-da ınjener bolsa, Aınur - shahardaǵy №26 orta mektepte aǵylshyn tili pániniń muǵalimi. Ekeýi Syrym, Symbat esimdi balapandaryn ósirýde.
«Árıne, árkim de óz baspanasy bolǵanyn ańsaıdy. Elbasynyń bes áleýmettik tapsyrmasy aıasynda «7-20-25» baǵdarlamasy qolǵa alynǵannan keıin sharttary qoljetimdi ári tıimdi bolǵandyqtan, qarjy jınaqtaı bastadyq. Baǵdarlamanyń bir unaǵan jeri, baspanany óziń tańdaı alasyń. Sondyqtan biz balamyz «Soltústik-shyǵys» shaǵynaýdanyndaǵy balabaqshaǵa baryp júrgendikten, sol mańnan eki bólmeli páter tańdadyq. Shilde aıyna deıin qarjy jınap, birneshe bankke baryp, «Tsentr Kredıt bankke» toqtadyq. Qujattarymyzdy tapsyrǵannan keıin keshiktirmeı, eki kúnniń ishinde rásimdedi. Jańa páterimizdiń ishki árleý jumystaryn da bitirip aldyq. 20 paıyzdyq alǵashqy jarna men ıpotekalyq nesıeniń jyldyq mólsherlemesi 7 paıyzdan aspaıdy. Aıyna 60 myń teńge tólep turamyz», dedi Aınur Álibekqyzy.
Aıta keteıik, shilde-qazan aılarynda 97 batysqazaqstandyq turǵyn atalǵan baǵdarlamaǵa qatysýǵa tilek bildirse, sonyń 47-si jańa baspanaǵa qol jetkizip úlgergen.
«7-20-25» baǵdarlamasyna qatysýshylar sany budan da kóbeıedi dep oılaımyz. Óıtkeni Elbasy «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýyn jarııalaǵan kezde atalmysh baǵdarlamanyń júzege asyrylý barysyna taǵy da toqtalyp, kedergilerdi joıý qajettigin aıtyp, ákimderge jergilikti bıýdjet esebinen jeńildetilgen ıpoteka boıynsha alǵashqy jarnany ishinara sýbsıdııalaý máselesin pysyqtaýdy tapsyrdy. Endi jas otbasylar úshin baspana alý jeńildeı túspek», dedi QazAqparat tilshisine Talǵat Nııazǵalıev.
