«7-20-25» baǵdarlamasy: Almaty oblysynda 2500 turǵyn úı salynady
TALDYQORǴAN.QazAqparat - Almaty oblysynda «7-20-25» baǵdarlamasy aıasynda 2509 turǵyn úı boı kóteredi. Osy nysandardyń ınjenerlik-kommýnıkatsııalyq ınfraqurylymyn retteýge bıýdjetten 2,1 mlrd. teńge bólingen, dep habarlaıdy QazAqparat tilshisi.
Oblystyq qurylys basqarmasynyń málimeti boıynsha, qazirgi tańda «7-20-25» baǵdarlamasy boıynsha Talǵar, Іle, Qarasaı, Panfılov aýdandary men Qapshaǵaı jáne Taldyqorǵan qalalarynda úı salynatyn 26 turǵyn aýdan anyqtaldy. Olardyń qatarynda Talǵar aýdanyndaǵy "Alma Taý", "Kók Alataý", "Alma Village", "Núrııa", "Pýgachev", Qarasaı aýdanyndaǵy "Alataý ajary", "Qarlyǵash", "Ómirzaq", "Órken" jáne Іle aýdanyndaǵy "Qoıanqus" jeke turǵyn úı kesheni men Panfılov aýdanyndaǵy "Nurkent", Taldyqorǵan qalasynyń ońtústik-batys turǵyn aýdanyndaǵy úılerge suranys basym.
«Jospar boıynsha osy alaptarda jalpy aýmaǵy 3,8 mln. sharshy metr bolatyn 103,7 myń páterli 2509 turǵyn úı boı kóteredi. Osy nysandardyń ınjenerlik-kommýnıkatsııalyq ınfraqurylymyn retteýge bıýdjetten 2,1 mlrd. teńge bólingen», - delingen vedomstvonyń jarııalaǵan aqparatynda.
Sonymen qatar, óńirdegi ekinshi deńgeıli bankter de baǵdarlamany júzege asyrýǵa atsalysýda. Qazirgi ýaqytta ekinshi deńgeıli bankter quny 2,0 mlrd. teńge bolatyn 197 ótinim qabyldaǵan. Onyń ishinde somasy 1,2 mlrd. teńge bolatyn 113 ótinim maquldanǵan. Nátıjesinde «7-20-25» memlekettik turǵyn úı baǵdarlamasy aıasynda baspanaly bolatyndar qatary arta túspek.
